Aithangveli hi van chunga awm a ni a, Thlihranthanga hi leia awm a ni a.

Nikhat chu Aithangveli te nufa chu leipuiah an feh a, an leipuiah chuan vani-an hi a lo hminsen tuar mai a. Aithangveli chuan, “Ka nu, hei ang hi mihring an awm ang em?” a ti a. A nu chuan, “Awm e, thlanga Sesuahsanga fapa Thlihranthanga a awm an tia lawm,” a ti a. Ani chuan, “Ka zawng dawn e,” a ti ta a, tichuan Thlihranthanga zawng chuan a kal ta a. Pitarte leipui feh haw hi a tawk a, “Ka Pi i vun ka ha ang e,” a ti a, ani chuan, “A ni tak e, Kawlhte, thih hi ka chak em a, min that la, ka vun hi hik teh tak khai” a lo ti a. Tichuan, a that a, a vun chu a hik a, kawrah a ha a, a kal leh ta a.

Thlihranthanga in hnuaiah chuan arte chiap hian a zuk chiap leu leu va, Sesuahsanga chuan, “Thlihranthang, ar lawi hmaih I nei em ni, zuk en leh teh,” a ti a, a zuk en a, pitarte chu a zuk hmu ta a. “Ka pa, pitar a ni” a han ti a, a pa chuan “Se vengah I tha ang em? han ti teh” a ti a. Thlihranthanga chuan “Se vengah I tha ang em?” a han ti a, “Tha ang” tiin pitar chuan a lo chhang a. Tichuan, in chhungah an hruai lut a, an awmpui ta a. Thlihranthanga chuan pitar se venna turin an leipuiah chuan thlam a zuk sa a. Pitar chuan, “I thlam sakah chuan pipu suih ang che aw” a ti a, ani chuan “Pitar te te pipu I uai peih dawn em ni?” a ti a, pitar chuan “Peih e” a ti a. Tichuan, Thlihranthanga chuan thlam tlungah chuan pipu chu a suih ta a. Pitar chuan chutah sial a veng thin a.

Nitin hian Thlihranthanga chuan pitar chu chaw a pe thin a, pitar chuan, “Lo lu atangin thawm han nei thin ang che” a ti a. Ani chuan a kal apiang hian thawm a nei ziah mai thin. Chu pitar chu Thlihranthanga nu chuan a haw em em mai a. A nu chuan chu pitar chu a huat em avangin, a ei atan sazu ek te nena infin nuai hian chaw a siam thin a. Nimahsela, Thlihranthanga chuan pitar chu a khawngaih a nitin hian buhrum leh sa a eitir zawk thin a. Nikhat chu Thlihranthanga chuan, “Ka en thla tehreng ang” a ti ta a. Thawm nei hauh lovin lo lu chu a zuk dak dek dek a, pitar chuan a tar vun chu a lo hlip a, pipuah chuan a lo uai der der mai a,

“Pipu ka suih leh tual a rawn tang e
An tha hniang hnamte man lang e”

a lo ti diai diai mai a. A thatzia chu a en hian a eng phut mai a.

Chutichuan a rukin a haw ta vang vang a, a pa hnenah chuan a han sawi a, “Ka pa, pitar se venga kan hman kha pitar a ni awzawng lo. Aithangveli an tih kha a ni a, a hmel thatzia mai chu kan vau ngawpui kha a thatnain a en hian a en phut mai” a ti a. A pa chuan “I nu hnenah chuan sawi hlek suh. Zuk kal leh ta la, zuk man tawh” a ti a. Tichuan a ruk chuan a zuk kal leh ta dek dek a, ani chu pipuah chuan a lo la uai a, a han en vel thin a, a thatna chuan a vel zawng zawng chu a en phut mai si a, a pipu hlaah chuan

“A nun e khawng se in lo ti,
A pan e khawng se in lo ti,
Liang mang aw, khawng aw lo”

a lo ti leh diai diai mai a. Chuveleh Thlihranthanga chuan a veh den den a, a man chawih mai a. Aithangveli chuan, “Thlihranthang, min man suh, I nuin min huat em kha” a ti a. Ani chuan, “Hetiang I nih hre hek lo, pitar emaw a ti che alawm. A haw tawp lo ang che. Ngawi rawh, kan inneih theihna ka ngaihtuah ang e” a ti ta a. Thlihranthanga ni chu zawlnei a ni a, a ni inah a hawng ta a. A ni hnenah chuan “Ka ni, ka pum ka ti na der ang a, ka nute’n thum an rawn vawr chuan, ‘In ina pitar hi a neih loh chuan a dam lo vang’ lo ti ang che” tiin a rukin a hrilh diam a. Ani chuan a lo remti mai a.

Tichuan, Thlihranthanga chuan a pum a tina der a, mumal nei lo tawpin a let tawp tawp mai a. “Ka nu, ka ni va zawt teh u” a ti a, tichuan a nu chu a va kal a, thum chu a vawr a, a ni chuan “In ina pitar saw a neih loh chuan a dam lo vang” a lo ti tlat mai a. A nu chu a lungni lo khawp mai a, “Tlangvalin pitar neih thu va awm suh” a ti a, a va haw a. Thlihranthanga chuan “Ka nu, ka ni chuan engtinnge a lo tih” a ti a, a nu chuan “Engmah a sawi lo ve” a tihsan mai a. Thlihranthanga chuan “Ka pa, nang va kal ve teh, heti zawngin ka nung zo dawn lo ve” a ti a. A pa chu a vak kal ta a, a ni chuan “In ina pitar saw a neih loh chuan a dam lo vang” a lo ti leh a. Chuveleh a pa chuan “Pitar mah ni se, damna tur a nih phawt chuan a nei tur alawm” a ti ta a. A pa chu a va haw ve a, “Ka pa, ka ni chuan engtinnge a lo tih” a lo ti a, a pa chuan “A! In ina pitar saw a neih loh chuan a dam lo vang a lo ti a, engpawh ni se, damna tur a nih phawt chuan I nei tur alawm” a ti a. A nu chu a thinur ta em em mai a, “A nei lo tawp ang, a neih chuan ka awm hlei lawng e” tiin a tang tlat a. A pa chuan, “Chutih thu a awm hlei ang, a dam alawm kan duh” a ti a. Tichuan innei turin an inbuatsaih ta a.

Thlihranthanga pumna pawh chu a lo dam a, an innei ta a. An induh zan chuan a nu chuan Thlihranthanga leh Aithangveli inkarah chuan, pate te, arbawm te, suk te hi a dah hnawk teuh a, inkar hla takin chhuatah a muttir bawk a. A nu muthilh hlan chuan an inkara mi zawng zawng chu kawmcharah an dah bo vek a, innghengin an lo mu a. Aithangveli chuan a tar vun hak chu a hlip a, an inchhung zawng zawng chu a en phut mai a, chutih lai chuan a nu muhil chu a lo harh a, khua a var emaw a ti a, a han hawi vel a, a mo nu that eng a lo ni zawk a. Chutih lai chuan Thlihranthanga chuan Aithangveli tar vun chu meiah a lo rawh sak tawh a. Zingah chuan an han tho va, Aithangveli chuan a tar vun chu a han ha dawn a, a lo awm ta lo va, a en hian a eng phut mai a. Thlihranthanga nu chu a zak ta em em mai a, a ngaihna a hre lo va, a tlan ta mai a, a haw duh ta hlek lo va. Aithangveli chuan “Thlihranthang, ka kal mai ta nge, I nuin hawn a tum si lo, heti chuan ka tan pawh a nuam bik lo ve” a ti a. Nimahsela Thlihranthangan a phal si lo va. “Thlihranthanga nu kha lo haw tawh rawh se, a lo haw loh chuan a mo nu a kal leh dawn e” an han ti thin a, ani chuan “Kal lo ve, ka lo haw ang e” a ti thin a. Kaiten hi a va kai dawn uaih uaih thin a, a zak a, a haw ngam leh thin lo va, a kir leh thin a. Chutiang chuan an innei reng a, fa pakhat an nei ta a.

Aithangveli chu a paten lak chhoh leh an tum ta a. Aithangveli chuan a pasal hnenah “Khai le, tunah chuan ka paten lak chhoh leh min tum ta a, thliin min rawn hruai dawn a ni a, mahse mi pawm tlat la, engmah chuh suh ang che” a ti a. Tichuan, thlipui chu a maka makin a lo thawk ta hum hum mai a, Aithangveli chu a pasal chuan khumah pawnpui hnuiah a pawm tlat mai a. Thli chu a nasa khawp a, an bungrua zawng zawng chu a let remrum tawh mai a. Mahse Thlihranthanga chuan engmah a ngaihsak hlek lo a. An tapchhak zawlah chuan an nau chaw bel hi a lo lum ta ter ter a, “Khawnge saw chauh saw chu maw” a ti a, a han ban a, chutia a han kan deuh hlek veleh chuan Aithangveli chu thli chuan a len chhuak ta daih mai a.

Thlihranthanga chu lungleng hian a tap a tap mai thin a, mahni-lo-maha a lunglen nak alai chuan an fa te kha a thi leh ta hlauh mai a. A tawpah chuan ani pawh chu lunglengin a thi ve ta a. Chutia an pafaa an thih tak avang chuan Thlihranthanga pa chuan “Aithangveli kha lo zin teh se, a pasal leh fa pawh an thi a” tiin a han chah a. Aithangveli chuan “Ka pa ka zuk kal ang em?” a ti a, a pa chuan “Zuk kal ta che u, amaherawhchu hma deuhvin lo haw ula, tin, in kal dawn rau rau chuan kan huana fu-ai hi keng ta che u” a ti a. Tichuan fu chu an keng a, an zuk kal ta a. An zuk thlen chuan lal thi tih takah inchhung chu an lo khat khup mai a, Aithangveli chu a lo lut a, “Aithangveli a lo kal, kawng lo kian rawh u” an ti a, mi chu an kiang duak duak mai a. In chhung an va luh chuan “Kei chu ka tap dawn hlek lo a nia, tah chu ka duh lo a ni. Amaherawhchu, ka pu biak ka duh e” a ti a, a pu chu a han bia a. “Tunah hian tinung leh thei ila khi lama hawpui I remti ang em?” tiin a zawt a, a pu chuan “E! I tihnun theih phawt chuan ka rem ti e” a ti a. Tichuan, a fu-ai chu a han phuh ser ser a

“Thenawm ing e, in zal hnuaia,
Zing awm ing e, ki rai lai”

a han ti a, chuveleh a lo phu ta hrut a, a fu-ai chu a han phuh leh ser ser a,

“Thenawm ing e, in zal hnuaia,
Zing awm ing e, ki rai lai”

a han ti leh a, Thlihranthanga chu a ngai tein a lo nung leh ta a. Aithangveli chuan “Khawiah nge ka fa thlan, va phawrh leh teh u,” a ti leh a, “engmah a awm toh lo vang, a thihna a rei tawh em mai” an ti a. Ani chuan, “A ruh tal a la awm ang” a ti a. An va phawrh ta a, a ruh chauh a lo ni tawh a. “Changel kawr han la teh u” a ti a, changel kawrah chuan a fa ruh chu a chuktuah khawma fu-ai chu a han phuh a

“Pialremi e, an to tawh hnu,
Lungawmi e, ki rai lai”

a han ti leh a, changel kawr chu a tisaah alo chang a, a fa chu a ngai ang thanin a lo nung leh ta a. An lawm em em mai a. Aithangveli chuan, “Khai le, ka pain rei chu zuk awm suh ang che u a ti a, kan khaw lamah kan haw tawh ang e” a ti a. A pu chuan, “Tute then dawn manah ni khat chu kan awm teh ang” a ti a, a pi pawh chuan a ti bawk a, chutichuan an ti an ti a, ni 20 ngawt an awmpui ta a. A tawpah chuan Aithangveli chuan “A ni zozai ta lo, kan haw tawh ang” a ti a. Chutah chuan thawnga-leivirin a hruai ta daih mai a, van lamah an chhohsan ta a.

Aithangveli nu leh pa chuan an lo hmu a, an lawm em em mai a. Hlim em em in an awmho ta a.

A tawp ta

Source: Mizo Thawnthu, Dahrawka

† Mizo Thawnthu List Directory