Mualzavata [Mizo Thawnthu]

pic source: ruralindia.org

Hman lai hian Lal mak dang dai tak mai hi a awm a, a chak leh a len em avangin a hming pawh a thang hle mai a. Vawikhat  hu “Lo ka vat dawn e” ati a. Nikhat thil thu lekah mual za lai a vat zo der a. Nikhat chhung leka mual za lai a vah zawh hman avangin Mualzavata tiin an sawi lar ta a. Mualzavata chuan amah ang bawk a chak nupui a nei a. Lo hal a huna lo chu an hal ta a, thlai chi te an thlak a, buh te an tuh zawh hnu chuan, hlo thlawh a lo hun ta a, Mualzavata nupui chuan nikhat chhung lekin an lo, mual za lai chu a va thlo zo ta der a.

Vawikhat chu Mualzavata chuan a khuate hnenah “Tumah feh chhuak suh u, ka hmui hmul ka hiat dawn e,” a ti a. A hmuihmul chu an hiat ta a, a kamah pasaltha rual khatin an lo chang a, Sakhi te, Sazuk te, Sakuh te, Tlumpui te, Sanghal te, Sanghar te chu a hiat chhuak ta nawlh nawlh mai a. Pasalthate chuan an lo that zel a, an sa kah sa chu khawtlangin an insem a, an hlimpui hle hlawm a. Vawi khat leh chu Mualzavata chuan, “Ka kam ka thuah dawn e, tumah ram kal suh u,” a ti a, tuman an ram kal ngam lo va, hmeithai pitar pakhatte hian, “Eng em kan ti hlei nang,” a ti a, thingphurin a chhuak lui a. Chutah le!! Mualzavata chuan a kam chu a han thuah ta a le!! Sakhi bawp te, sial lu ro te, sazuk ki hreu tha tak takte hi a rawn phuh chhuak ta ur ur mai a. A kam thuahna tui chu sabereka khuangkaihah a chang a, pitarte thing phur kha a len ta vawn vawn mai a!! “Tun thleng hian a la ri ta rek rek reng e,” an ti.

Mualzavata mit chu a mim leh ta tlat mai a, amit mim en tur chuan pa ho chu an inhawr khawm ta a, a mit chu an han keu ta a, a mit hlawh nan chuan phulrua an la a, rawcheh an siam a, an han hawlh ta rawk rawk a, arbawm chhia te, emping chhia te, thlangra te leh kho te chu an hlawh chhuak ta rum mai a. A khuate chuan, “Ka pu i mit men a nuam deuh tawh emaw chu?” an han ti a. Mualzavata chu an meng suar suar a, an khap suk suk bawk a, “A … a .. ka mit sirah hian min la kam relh relh mai,” a ti a. An han en leh nak chuan pa pakhat chuan, “Khi ta khi, dum nel nel ka hmu e,” a ti a. An han hawlh leh rawk rawk a, sakhi nua hi an hlawh chhuak leh ta a!! Vawi khat chu, “Vaibel ka zu dawn e,” a ti a. A vaibelah chuan a hote chuan Vahchap hi an beng teuh a, Mualzavata chuan an tan kai a, an pak ta tulh tulh mai a. Khua a mite chuan a vaibel zuk khuk a ni tih hre hek lo, ruah thimpui a rawn thawk dawn ta emaw an ti a, an buai phili ta hle mai a.!!

Mualzavata ram kal hi vawikhat chu a muthlu a, a ban chu kawrteah a kham kai ruah mai a, Pitarte thing phur hian thingtuluang emaw tiin an chek chhin a, Mualzavata chu a phu ta uih a, Pitarte chu a per leng ta lawng lawng a, tunthleng hian a la ri ta rawk rawk reng a ni. Tumkhat chu mi pakhat hian thah a tum a, Mualzavata chuan arbawm tur hi a lo tah mek a. Mualzavata hnungah chuan chempuiin a har lak ta hlawk hlawk mai a. Mualzavata chu na ti awm ang pawn a awm duh hlei lo va, a sah rei tak deuh hnu chuan, “Thiana, i mi han fiam dan hlek hlek chuh, a va thip deuh ve le,” a ti duh chauh va. Vawikhat chu an ramvak hian chhun chaw fak a tum a, chaw hmeh tur lah chu a nupuiiin a lo fun sak tel si lova, Reiek tlang leh Lungdar tlang a kar a, chaw a fak ta a, Tlawngnuara Sangha awm zawng zawng chu a hmeh zo ta vek a.

Tukkhat chu Mualzavata te thianza ho hi an zin ho va, mi chak danglam bik tak tak hlir an nih avangin tiang atan thingin a dawl thin loh avangin thirtiang an hawl theuhva. Mualzavata thiante ho chu Lamlira te, Phawlawngzamngira te, Pangpuielhtliaka te, Saikhaia te an ni a. Hmeithai pakhat inah hian an thleng a, Phawlawngzamngira chuan a tiang chu an tung a, hmeithai in chuan a dawl zo ta lova, a tlu ta mai a. Phawlawngzamngira tiang hi a lian tha hle lah tak a, pa vantlang malpui tiat lai a lian hi a hawl thin a, a pa chu thirdeng a nih avangin a pa chuan a tiang tur hi a chher sak thin a. Malpui tiat lai mah ni se, a hawl tliak leh mai thin a ni. A pa chuan pa pawm laia lian hi a chher sak a, chu pawh chu a la hawl kul zek zek reng a. Thir te a van deuh avangin a pawm ta rih a. Chutianga lian leh rit chu hmeithai in chuan dawl hek lo le, a tlu sawp ta vek mai a ni.

Chutia Pitarte in ber a tluk tak siah chuan Pitarte chu a tap karh karh reng a, “Aw, a van pawi tak em, kei atan in sakte a harsat vei nen aw,” a ti a. Mualzavatate ho chuan, “Ka pi, lungngai duh mah ta che, inte chu kan sa leh mai tur a lawm,” an ti a. Pitarte chuan a awih duh lo va, “Nangni khualzin kal laiin chuti maiin inte chu in sa thei hlei lawng nge,” a ti a, a tap keuh keuh reng a. A tuk khua a lo var chuan hmeithai pitarte in chu an sak sak ta a. Pangpuielhtliaka chuan thing lian puipui chu a ban a tan a elh tliak hmawk hmawk a. Saikhaia’n awlsam takin a lo khai sawn zung zung a, Phawlawngzamngira leh Mualzavata te chuan an duhna lai laiah an lo sawh phun hmiah hmiah a, Lamhlira’n a hman dan hrang zelin a lo kuai phei ve leh bawk a. Tichuan, hmeithai chu in tha deuh mai an sak sak ta a. Pitarte chu hlim takin a nui ve leh ta kar kar a. (14/2/2005 Zofa Run)