CHAMPHAI VENGLAI BRANCH YMA 2025
ZUALKO (3)
Hming : Lalnunfeli Fanai
Kum : 34
Veng : Champhai Venglai
A pa : F.Lalbiakmawia(Fam)
Thih ni : Ni 12.02.2025 Dar 2:15AM
Vui hun : Ni 12.02.2025 Dar 12:00NOON
An unau :
- Lalnunfeli Fanai(sun mek)
- F.Aisavunga, Aizawl
- F.Hmingsangzuala h/o Zothansangi, Champhai Venglai
- F.Lalduhkimi w/o R.Lalchawimawia, Champhai Vengthlang North
Kohhran : Presbyterian
Vuitu : Pastor.K.Laltlanhlua
Sd/-
Secretary
Venglai Branch YMA, Champhai
Zaithiam Feli Fanai a her liam ta
THALAI TIMES
February 13, 2025 Zozam
Mizo hmeichhe lengzem khawvela hriat hlawh ber zing a mi, Feli Fanai tia hriat lar em em, Lalnunfeli chu nilaini zing dar 2:15 khan, kum 34 mi niin, Ebenezer Hospital-ah a thi.
Feli Fanai hi hun rei tak chhung damdawi inah enkawl a ni a. Natna neuh neuh nei a ni. A ruang hi Ramhlun North-a Industry muala a pu inah nghah phawt niin, hemi hnuah ambulance-in Champhai panpui a ni a, nimin vek khan vuiliam nghal a ni.
Feli Fanai hian nikum December thla lai hawl vel atang khan a hriselna insawisel nasa tanin, Aizawl Hospital panpui a ni a. Damdawi in panpui ni hian ICU-ah dah luh nghal a ni.
Hun eng emaw chen Aizawl Hospital-ah enkawl a nih hnuah, ziaawm lam a pan hleih theih loh avangin kumin tir, January 6, 2025 khan Ebenezer Hospital-ah sawn a ni a. ICU-ah dah luh nghal a ni. Hemi hnu hian, damin damdawi in a chhuahsan leh tawh lo!
Zo rimawi khawvela a cham chhungin Feli Fanai hian ‘hit’ single a hnutchhiah nual. Chung zingah chuan ‘Lengdang Tang A Bel’ tihte, ‘Pheichhehmawi I Khai Ang Aw’ tihte, ‘Ti Ve Mai La’ tihte leh trio anga a thiante pahnih – Zaii Hauchhum leh Michelle Varte te nena an siam ‘Ka Tan I Mawi’ tihte a tel.
A music video hmasa ber ‘Min Hlan Leh La’ a tihchhuah atang khan Feli Fanai hi Zo rimawi khawvel hian a hawisan leh tawh lo. He music video a tihchhuah hnuah, November 19, 2013 khan a studio album hmasa ber, ‘Fam Khawlawi’ tia title a vuah chu, Chanmari YMA Hall-ah a tlangzarh a. A debut album a tihchhuah ni hi, amah hringtu a pa thih champha chiah niin, a pa hriatrengna pualin a tlangzarh a ni.
A debut studio album ‘Fam Khawlawi’ ah hian, hla 10 a dah a. A album-a hlaah te hian a title nen chhiar telin Zoremi Colney hla phuah pali a awm a, Masthanga, Kima Chhangte, Agnes, Madina Khiangte, CFL Hmingthanga leh John Mawitea te nupain hla pakhat theuh an thawh bawk.
A album hmasa ber a tihchhuah atanga kum 7 hnuah, a album pahnihna leh a hnuhnung ber tur ni ta chu, January 30, 2020 khan digital platform kaltlangin a tichhuak a, Apple Music-ah te a dah chhuak a. He album hi — Tuma’n An Tluk Lo — tiin title a vuah a. A album-ah tracklist 13 awmin, heng zinga hla pahnih — Then Che Ka Hlau — leh — Min Hlan Leh La — tihte hla hlui, a album hmasa bera a lo dah tawhte an ni.