Sumsuih khaw thlang, pasaltha Neuva te khua Zawngtah khaw thlangah hian Lusei lal Suakpuilala fapa Lalchhunga khua Thingsei khua a awm a. Chumi khua ah chuan fapa mal, fel tak leh hawihhawm tak, hmeltha tak bawk si Thangzawra a awm a. Nula nungchang mawi leh hmelchhelo tak Lalhniangi a awm bawk a. An pahnih chuan an inhmel dunin hlo thlovin kum thum lai an inlawm a.

Tichuan, Thangzawra nupui atan Lalhniangi chu palai tirin an dil ta a. Anni chuan an lo remti a, mahse Lalhniangi man atan chuan silai an lo ngen tel a. Chung hunlai chuan silai chu a hluin a nei zo pawh an tam lo va, Thangzawra pa chuan a phal ta hauh lo mai a. Inthlahrung tak chunga Thangzawra’n, “Ka pa, silai te chu a dang pawh kan la ngaihtuah leh thei dawn lawm ni?” a ti dek dek a, a pa chuan, “Nang tehlul hian i damchhungin silai chu i nei leh thei tawh ngai lovang,” a ti ta erh mai a. Tichuan an innei thei ta rih lo va.

Anni pahnih chu an la inzui zel si avangin an mualpho ang tih hlauvin Lalhniangi chu Neihbawi khua ah an pempui ta daih mai a. Thangzawra chu a lung a lengin hna pawh a thawk hleithei ta lo va. A pa pawh a mangang ta a. Lalhniangi man atana silai a ui chu a inchhir a, a phal ta a. Thangzawra chuan silai chu puin phur em emin Lalhniangi te khua chu a pan ta a. Sateek khua a thlenin Neihbawi khaw mi pahnih a tawk a, “Lalhniangi’n pasal a nei tawh em?” tiin a zawt chawt mai a, anni chuan, “Nei tawh e,” an ti a. Mahse a la nei hauh si lo va. Thangzawra chu a lu a hai mup a, thlantuiin a bual bawrh bawrh a, a thu ta hnawk mai a.

Rei vak lovah chuan a lo ding a, an khaw lam chu a pan leh ta hnak hnak a. In a thlen chuan, “Kha u in silai, Lalhniangi manah pawh kal hlei lo hi,” tiin kawngka atangin silai chu a khawh lut a. Heta tang hian Thangzawra chu a lungleng lutuk awm ngaihna hre mang lovin a awm thin a. Hna a thawk thei lo va, a mu ngawih ngawih thin a. A chang leh Lalhniangi nena an sulhnute a chhui a chhui a.

Nikhat chu a nu mangangin artui a chhum sak a, kheh sain a pe a. Thangzawra chuan a hmuam a, a seh keh zo ta lo a ni an ti a ni. Thingsei ram lo a an neih kumin an lo atang chuan Lalhniangi te khua Neihbawi chu a lang chiang em em a. An vau kawrte pakhatah chuan lungphek inkham kai hi a awm a, chu chu a zawh thin a, “Lung-lei” tiin an vuah ta nghe nghe. Lungpui chungah hian bawkin a dawhkilhin lung chu a kher a kher thin a, chung a kher khuar te chu tunah pawh hmuh theihin a la awm a. Nikhat chu lungpui chunga bawk chunga Lalhniangi te khua a thlir chu a mittui a tla zawih zawih a, a hnuk a chat ta a ni an ti a ni.

+ Mizo Thawnthu List