Hmanlai hian tlangval hmelchhe ve tak mai, pate bawk si Maurawkela hi a awm a, bawm tawt atanga pawhchhuah hlim ang chhap a pawr phang mai hi a ni reuh a, chu achhapah mi chhe fa a lo ni leh zel a, mite hriat hlawh tak pawh hi a ni ngai lo va.

Maurawkelate khaw lal fanu chu a hmelthain a taima hle a. Mi feh hmain a feh hman ziah a, dai pal tur a tam thin tehlul nen a puan huh miah lovin a kal thei bik thin a. Mite chuan mak an ti hle thin a ni. “Engtin nge maw daidaw hei zozai pal tur awm a, puan huh miah lova a kal theih bik ni,” an ti luai luai a. Lal fanu chuan intihtheih nan tak a hmang a, a uan pui hle thin a.

Vawi khat chu Maurawkela chuan an lal fanu feh kal chu a enthla ru ta a. Lal fanu chuan Maurawkelan a enthla tih hre hek lo, dai pal tur a tam chinah chuan a puan chu a hlip a, a phur ta daih mai a, ruakin a kal ta leu leu mai a. Thlam a thlen chuan a puan chu a bih tha ve leh ta mai a. Chutianga ruaka a kal Maurawkelan a lo hmu reng a ni tih a hriat chuan a mangang ta hle a. Maurawkela chuan, “I puan a huh ve ngai loh nachhan ka hre ta” a ti a, a nui ta kar kar mai a. Lal fanu chu a hrilh hai hle mai a, chu a chhapah, Maurawkela chuan, “Thiante zinga sawi dan tur ka hre ta,” a ti deuh reng a. Lal fanu chu Maurawkelan a sawi thaih vel avang chuan a hlauthawng leh zual a.

A tihngaihna hre lo chuan, “Maurawkel, sawi miah lo la, thi ka pe ang che,” a ti ta ngawt a. Maurawkela chuan, “Nidang maha thi nei ngai hlei lo, miten khawi a mi nge? An ti ang asin le,” a ti ta tlat a. Lal fanu chuan Maurawkela ka hup dan tur chu a ngaihtuah chhuak thei lawk lo va. A tawp a tawpah chuan, “I mu dun mai teh ang, sawi hlek suh ang che,” a ti ta ngawt a. Maurawkela chuan “Aw le” a ti a. Tichuan an mu dun ta a.

Lal fanu chu a lo rai ta a. “Tu fa nge i pai?” an tih pawhin a sawi duh ngai lova, a zep tlat a. Maurawkela lah chuan engmah a sawi ngam ve bawk si lo va. Lal fanu chuan a fa paina chu sawi duh hek lo, nau chu a hring ta a, tuman a pa an hre thei lo va. Lalpa chuan naute pa hriat loh ngawt chu dikin a hre lo va, hriat chhuah tumin a bei ta a.

Vawi khat chu an khawtlangin sangha an vua a, chumi tum chuan Lalpa leh naupang te chuan kawt chhuahah an lo hmuak a, naupangin an thilpekte lawm taka a lo lak a, “Ka pa” a lo tih ngei beiseiin naupang tih lawm nan thil hrang hrang an hawn hlawm a. Naupang te chuan tu thil hawn mah chu a laksak duh lem lo va. A hnuhnung berah chuan Maurawkela chu a rawn kal ve ta hnak hnak a, naupang lawm atan thlangdar a rawn hawn sak ve a. Thlangdar chu a bawp leh lam a sik bul a, hmawlh tein a thil a, thlangdar chu a lam vir char char a, Lalpa leh naupang awmna bul a rawn thlen chuan naupang te chuan, “Khawi ka pa, khawi ka pa,” a lo ti a. Lalpa chuan naupang pa chu a hrechhuak thei ta a.

In an thlen chuan Lalpa chu a thinur hle mai a, a fanu hnenah chuan, “Maurawkela hi maw i fa paina chu!!” a ti a. Maurawkela te ang fa a lo pai mai chu a hrethiam thei ta hauh lo mai a, a fanu chu a hnawtchhuak ta hial a. Chutia a hnawhchhuah takah chuan lal fanu leh Maurawkela chu lo lamah an tlan dun ta ngawt a. Reiloteah lal fanu chuan Maurawkela chu a lungten leh ta mai a, thlam chhunga riah ve pawh chu a phal ta lo va. Maurawkela leh a ui chu thlam hnuaiah an riak thin a.

Vawikhat chu, Maurawlkela leh a ui ramvak chuan dil mak danglam tak awmna hi an va pawh hlawl a, Maurawkela ui chu dilah chuan a tla palh ta hlauh mai a, a rawn chhuah leh chuan ui duhawm tak mai leh hmeltha takin a rawn chhuak ta mai a!! Maurawkela chuan mak a ti hle a, that ve deuh beiseiin chu dilah chuan a inbual ta a, a inbual zawh chuan a lo hmeltha ta em em mai a. Tichuan thlam lamah chuan an kir dun leh ta a.

A fapain a lo hmuh chuan, “Ka nu saw ka pa a lo haw,” a ti a. A nuin a en chuan a lo that tak em avangin Maurawkela kha ni ta lovin a hria a, a ngaizawng ta hle a. Maurawkela chu thlam chhungah pawh chuan lut ngam chuang hek lo, a thil hawnte chu thlam leihka bulah a dah a, thlam hnuaiah chuan a lut leh ta a. A chet phung velah chuan a nupui chuan Maurawkela ang riauvin a hria a, a fapa lah chuan, “Ka pa a ni ngei e,” a ti tlat a. A nu chuan, “Nanga pa ve te chu hmelchhe te a nih kha,” a ti tlat thung a. Chutia a fapain “Ka pa a lawm,” a tih tlat vang leh a lo that tak em avangin, “Chutia i pa a nih hrim chuan thlam chhung rawn lut ve turin sawm rawh,” a ti a.

Naupang chuan, “Ka pa, lo lut rawh, ka nu’n a ti,” a ti a. Maurawkela lah chu a la lut ngam ta chuang lo va. Lal fanu chuan a ngaihzawn tak em avangin a fapa hnenah chuan, “Taite, tlang banah sawn va uai la, ka pa ka tla dawn e va ti la, i pa chu a lo haw duh ang e,” a ti a. A fapa chu tlangbanah chuan a va uai ta dar dar a, “Ka pa, ka tla dawn e, min hlang thla rawh,” a va ti a. Maurawkela chuan “I nu’n min lo hau dah ang e,” a ti tlat a, a hlang thla ngam chuang lo va. A hnu deuhah chuan a nu chuan a fapa chu a tih dan pangngai bawka ti turin a tir leh a. Naupangte chu tlangbanah bawk chuan a va uai leh ta dar dar a. “Ka pa, ka pa ka tla dawn e, min lo hlang thla thuai rawh,” a ti tlat a, a fapain a pa a koh lai chuan a nupui chuan, “Faten min hlang thla rawh ti ti a, va hlang la ti nia,” a lo ti a. Maurawkela chuan a va hlang a, thlam chhungah chuan a rawn luhpui ta a. Tichuan an awm ho ve leh ta a.

Chutianga hlim taka an awm lai chuan Maurawkela leh a ui chu an ramchhuak leh ta a. Zawng rual danglam tak hi an hmu ta a, zawng ho chuan thei hi an lo tlan malh malh hlawm a, an zing hotu leh lian ber chuan Khuang danglam tak mai hi a nei a. Zawng lalpa chuan khuang chu an beng a, “Zar khat hmin raw pip!!” an ti a, an thei tlan zar chu a hmin ta vek a. Zawngho chuan an tlan zawh veleh an lalpa chuan khuang chu an beng leh a, “Zar khat hmin raw pip!!” an ti leh a, zar khat dang chu a hmin leh ta mai a. Maurawkela chuan a ruk tein a thlir reng a, zawng khuang chu neih sak a duh hle mai a. Zawngho chu an zui ru ta a.

Maurawkela leh a ui chuan zawngho inrin loh lai takin an bei ta thut a, zawngho hlau pheng chuan an khuang tha tak mai chu an tlanchhiat san a, an vanneih asiamin zawngho khuang chu an chhuhsak thei ta mial a. Maurawkela chuan khuang danglam tak mai a neih takah chuan an bul vela thing leh mau te chu mihringah a chan tir a, khaw ropui tak a din a, lal ropui takah a insiam ta a.

A nupui pate chuan Maurawkela khuaah chuan chhiah an rawn khawn thin a, Maurawkela te nupa chuan an ning hle mai a, vawikhat chu an rawn khawn leh a, an lo pe duh ta lo va. Maurawkela te khuain chhiah an pek duh tak lovah chuan a puzawnte khua chu an lungni ta lo va, Maurawkelate khua chu an rawn run ta mai a. Khaw daifem lama chengte chu an rawn that ta nghauh nghauh mai a. Maurawkela khuate chuan an ngam lo hle a.

Chutihlai chuan Maurawkelate nupa chuan lungmuang takin leihkapuiah hrik an in en sak melh melh a. An khuate chu an thi zo dawn ta mai a, ralho chuan Maurawkelate nupa hrik inen lai chu an rawn hnaih chilh ta hle a, Maurawkela nupui chuan, “Maurawkel, che ve tawh rawh le,” a ti a. Chutah le!! Maurawkela chuan a khuang chu an beng a, “Ka khua leh tuite rawn beitu zawng zawng hi thi raw pip!!” an ti ta a le … Ralho chu thawk leh khatah an thi ta vek mai a, ralhoin an thah tak ho zawng chu, “Lo nung leh vek rawh u pip!!” an ti leh a, an lo nung leh ta vek a.

Tichuan, tumah tibuaitu pawh nei tawh lovin hlim takin an awm ta a ni.

Source: (14/2/2005 Zofa Run)

+ Mizo Thawnthu Directory