Mizo zinga hmelchhe bera an sawi thin Saichawnkhupa hi Hmar hnam niin an sawi. Kan pipute hunlaia an khaw lian leh ropui ber Selesih khua, in sangsarih zet tlinga an sawi thina tlangval hmelchhe ber a ni a. A hmelchhiat em avangin tuman pasal atan pawh an duh lova, nupui tur hmu zo lovin a thi ta nghe nghe a ni. A chanchin sawitu thenkhat chuan a hmelchhiat em avangin nula tumah a lam hawiin nuih pawh an nui duh ngai lova, a chhiat lulai em avangin vawkte hian a chaw pek pawh an ei duh ngai lo e an ti hial bawk.
A hmel hi a chhe em em mai a, hmel a lawi pawh nei lovin a bawk kawi sawr bawl ṭuk mai a ni awm e. A hmelchhiat em em piah lamah a ha a la kuh zui bawk a, a ha hi a kuh em avangin a hmui vun pawhin a khuh seng lova, a hmuiin a khuh bak pawh sei fe a la lawr a, dawnfawh a laia phel phawk hi thil dang ruai miah lovin a dit zo vek thei a ni. A nuih ve te lah hian a heh chu a hahni lawk laiah a tang tlat thin a, amahin a chhuk thla leh mai thei lova,kuta pawh fat fat hnuah chauh a siam rem theih chauh thin a ni. Inring lawk fe lo chuan za takin a nui ngam ngai lo.
Vawikhat pawh Sikpui kut an hman tumin inring hman lo lekin a nui ve chiam mai a, a hmui chu a hahni lawk laiah a tang ta tlat mai a, a pawt thla leh mai thei si lova, an bul a miten theihtawp chhuahin an pawhpui a, rei tawk tak an pawh fat fat hnuah an siam rem thei ta hram a. A hmelchhiat piah lamah a ha kuh hi a buaipui hle a, a ha hi a hahni atang hian a kawhin a rawn kawh chhuak vuah mai a ni.
Tlangval ve na fam chuan nula hmel duh zawngte pawh an nei ve thin a. Nula ho lahin min ngaizawng palh ang tih hlauvin a lam hawi tak ngial pawn an nui tha ngam lova, ngaihmelh chu sawi loh an mitsir tak ngial pawn an melh tha ngam thin lova.
Tumkhat chu Sikpui kut an hman tumin nula kawppui tur a sawm kual ve a, Sikpui kut an hman hian tlangval ten kut hmanpui tur nula an sawm thin a, tlangval hnahkhat ni ve ta reng ruang chuan kut hmanpui tur nula a sawm ve a ni. A tirah chuan a hmel duh ve deuhte chu a sawm hmasa a, anni lah chuan mawi hnai taka lo hnar nan Thirkhai an lo pe a, an khaw nula zawng zawng a sawm kim vek hnuah pawh kut hmanpui tur nula sawm chhuah tur reng reng a hmu zo ta lova. Nula ho lahin thirkhai an lo pe zel hlawm a. A thinrim tihngaihna hre lo chuan an thirkhai pek khawm chu a so belhbawm ta ngawt a. A thirkhai so belhbawmna tlang chuan Thirhlum hming a lo pu ta a ni. Hetih hun lai hi Phullen leh Zawngin inkar vela an awm lai a ni awm e.
Saichawnkhupa pa chuan nupui a hmuh zawh loh mai a hlauh pui a, Saichawnkhupa hnenah chuan
“Bawiha, I hmel hi chuan nula tumah i rimthlu zo dawn lova, taimak zir la, buh leh bal thlo chhuak teuh la, faisa ring turin I nupui tur zawng ila hmuh pawh kan la hmu mahna le” a ti ta ngawt a.
Tichuan taima taka hnathawh chu a tum ta a. A hlo thlawh chhung zawng pawh chu in lama hawng miah lovin ramah a riak ta ngar ngar mai a. Leilung lan theih chhung zawng hlo a thlova, thahnem a ngaih zual chan deuhte phei chuan meichher eng hnuaiah te hlo a thlo thin a. A mut pawhin a diar pawh a phawk ngai lova, a diarah chuan hlo a tiak that a. A hmai ni se phih fai ngai hek lo, a bal khawn bing zung mai a, thenkhat laiah chuan pasi a to that mai a ni an ti.
A lo chu a thain miten an awt hle thin a, buh duah hluah hluah chu nula ten it em em in an thlir thin a. Hlain an chawi hial a –
“Saia sawnfa thlawh e,
Phaia changhnah bang tlim mah a e. “
an ti hial a ni. Buh seng a lo hun a, buh a ngah ta hle mai a. Nula tlangvalin an thiar pui chung pawhin an phur zo seng ta chuang lo va, a bang ta rei rui mai a, chumi hmun hming chuan Buhban hming a lo pu hlen ta a ni.
Buh ei sen loh a thlo chhuah hnuah pawh nupui tur a hmu zo ta chuang lo va, nupui nei lovin a thi ta a ni. An thih hian an hnam danah chuan kuang hmalam hi an hawng thin a. Mitthi raltu leh uitute hmuh theih turin mipui lam an hawiin kuangah an dah thin a, Saichawnkhupa erawh hi chu a chhiat lulai em avangin a chhungte paw’n an zahpuia, a kuang chu bang lam hawiin an dah e an ti.
A nupui tur hmu zo lo beidawng chuan hla a phuah ta hial a
“Ka pa kei chu awh hlum nuam ing e,
Ka thai tur tualah leng maw rawh e,
Dam lai ka ma maw.”
a ti hial a ni awm e.
A tawp ta
Source: March 8, 2005 Zofa Rûn