Thinlanga [Mizo Thawnthu]

THINLANGA

Thinlanga hi hmanlaia thlarau sual leh tihbaiawm tak mai a ni a, mihring angin a insiam a, a thin zawn hi a kaw buau mai a, a kawchhung te pawh a lang thei vek a, chu chu hnah hringin a hnawh thin a. Pheng­lawng tum thiam tak a ni a, Kanghmun khaw daiah thingbuk pakhatah a cheng thin an ti.

Nikhat chu nula pathum hi Thinlanga awmna lamah chuan thing phur turin an kal a. Mahni phur intan thei lo apiang chu inhawsanah, midang tumah pun loh vah an ti a. Tichuan thing chu an fawm ta a, an fawm zawh chuan haw turin an insiam ta a, an zinga pakhat chu amahin a phur a intan thei ta lova, a thiante chuan an haw san ta a. A thianten an haw san hnu chuan Phenglawng tum ri a hre ta a, a thianten an kalsan thui lutuk anga a umpha lovang tih hlauvin chu phenglawng tumtu chu tanpuitu atan a sawm ta chawt mai a. “Hei, nang phenglawng tumtu kha, khawngaihin lo kal la, ka phur hi min va chawi teh,” a ti a.

Thinlanga chuan, “Ka lo kal chuan min hlau ang,” a ti a. Nula chuan a hlau lovang tih a hrilh a, Thin­langa chuan “A nih leh ka lo chhuk ang a, ka tanpui ang che, amaherawhchu, min en hlek suh ang che,” a ti a, tichuan, a lo chhuk ta a. Nula chu a insum zo ta lova, a ruk tein a va bihru a, Thinlanga awm dan hlauhawm deuh mai, a thin lo inhawng huau mai, hnah hringa hnawh tut mai a han hmuh chuan a hlau ta em em mai a.

Thinlanga chuan a phur chu a han chawi sak a, heti hian a hrilh a. “Khai le hei hi hre reng rawh, I thil hmuh leh hriatte hi sawi reng reng suh ang che, I sawi vaih chuan ka lo kal ang a, ka that ang che. Hei hi hre rawh, kaw te tak teah pawh ka lut thei zel ania,” a ti a. Nula chu a haw ta a.

Chumi zan chuan tlangval tam takin chu nula chu an rim a. Nula chuan a thil hmuh leh hriatte chu a zep zo ta lova, a thing phurhnaah thil hlauhawm tak a hmu tih a sawi ta a. Tlangvalho chuan hriat an chak ta hle mai a􀂌, sawi thuai thuai turin an tur chhen ta mai a. Nula chuan bang awng zawng zawng hnawh ping hmasa turin a hrilh hlawm a. Chutia bang awng an hnawh phui zawh hnu chuan nula chuan a thing phurhnaa a thil hlauhawm hmuh chanchin chu a hrilh ta hlawm a. A sawi zo hman chiah tihah chuan pawn lam atanga lo ngaithla ru rengtu Thinlanga chu bang awng pakhat an hnawh hmaih atang chuan a rawn lut thut mai a. Nula chu a man chawt mai a, na takin pawnah a paih chhuak a, a lu lam chu leiah a bur chawt a, a letlinga awmin a pawnfente chu leiah a tla hnuang mai a. Mi awm zawng zawng hmuhah chuan zahthlak thei ang berin a siam ta a ni. Thinlanga chu a bo leh thuai a, a chenna thing­buk lam chu a pan leh ta a ni.

Source: Mizo Thawnthu (1992)