Aihniara [Mizo Thawnthu]

Hrang ZahawmaThawnthuLeave a Comment

Aihniara Mizo Thawnthu

Aihniara Mizo ThawnthuAihniara

Mizo zinga tuan rang bera piputen an sawi thin Aihniara hi Selesih in sangsarih khuaa tuan rang ber a ni a. A tuan ran zia hi miten uar takin an sawi thin. Aihniara tuan ran dan hi a makin a mak a, ram palailenga Tumpang tlanchhia a umte hian a khelah a beng thak thak hman thin.

Vawikhat pawh a thiante nen tumpang hnu an chhui a, reife an chhui hnu chuan tumpangin sihtui a dawt lai hi an hmu fuh ta a. Kah ngei tuma tan hmun an siam rem lai takin tumpang chuan an thawm a lo hria a, a tlanchhe ta phut mai a. An kap hman ta lo va. Aihniara ui chuan tumpang tlanchhia chu a um ta chiam mai a, ram palailenga in um mah ni se Aihniara chuan tumpang khelah a beng thak thak thei reng e, an ti. Lui dunga Chinrang chhuk zawnga thlawk laite a um hian an mei a pawt bul thawt hman thin a ni. Sawi uar deuh thenkhat phei chuan Zawlbuk a tlan hel te hian a mawng leh mawng a pet zawt zawt hman e an ti.

Vawikhat chu ruahpui vanawn sur hnuaiah Zawlbuk atangin Lal ina kal a ngai ta tlat mai a. Ruah a sur nasat em avangin Zawlbuka awmho chu tumah an kal phur lo va, Valupa te chuan Aihniara chu tlawmngai turin an nawr lui ta a. Ruahpui sur hnuaiah chuan Aihniara chu Lalin lam panin a tlan a, hul phiangin Lalin a tlan thleng a, Lalin atangin hulphiang bawkin Zawlbuk a rawn tlan thleng leh bawk. A ban tlem chu a hnawm ve chap an ti.

Vawikhat chu lawm a ruai a, sawm tha zet an feh a. Chhun ni sensa hnuaia hlo thlova an han bung chu le, an tui a hal ta a, tui chawina tur tuium tak ngial pawh an lo keng lo leh zel si a, Aihniara chuan aiawtin lo mawng lui tui chu a zu chawi ta a. Aiawt awng a tui lo put chhuak tur chu a lo hup phui hman zel a, a lawm te ho chu an duh tawkin a tulh ta theuhva. Chumai bakah chawfak huna an hman tur tui aiawt bawkin a chawi ngah vek bawk e an ti.

A tuan ran mai bakah pasaltha, sakap thei nih a fawm a, tumpang phei chu a kap thei chung chuang hle a, a thiante itisik thamin a kap thei a ni. Tumpang pel tur phei chuan ram chhuahpui tur pawh a hmu zo lo hial thin a ni. Tumkhat chu Tumpang pel turin an ramchhuak a, tumpang pawh an kap thlu ngei a, nimahsela, Aihniara chu a thi ta tlat mai a!! A thiante chuan, “Tumpangin a si hlum,” an ti a. A pa leh thenrual thate erawh chuan an awi lem lo, an itsikin an kap hlum niin an ngai thung.

Mizo zinga tuan rang ber Aihniara chu la valai takin mual a liam ta a ni.

Source: (March 9, 2005 – Zofa Run)

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Leave a Reply

Your email address will not be published. Required fields are marked *