Lehkhabu: Hman Lai Mizo Khawsak Dan leh Mizo Buai Lai Thu
Ziaktu: Padma Shri Rev. Dr. H.S. Luaia
Pic: efelote21 blogspot
3. Kan Inneih Dan
Mizo danah chuan inneih chungchangah hian nu leh pa thu hi a pawmawh ber a ni.
A dawttu chu ‘man’ a ni leh a, a pathumna chu a innei turte an ni ve chauh a ni.
Nula te an duh lo chung nu leh pain a man tura an lungawi vanga an tirh luih, tap zawih zawih chunga pasal nei an awm thin asin. Inneih dawn ni chuan a hmain zu an lo bilh lawk a, an insawi ni chuan zu an zu ta a, palai chu zing atangin inremtir tumin a vei ta zak zak mai a. Insawi rem mai chu tlawmah an neih a ni ang chu, nula nu leh pa chuan man tur eng eng emaw an lo ngen a, nilenga vei zak zak te pawh an awm thin a. Zu erawh chu an tlai hle thin.
Mipa nu leh pain an sawi rem har deuh chuan an lo hau ve a, a hahthlak hle thin a ni. A sawi rem hnu chuan mo lawina chu sial pawh ni sela, a dar chu palaiin a nei ve thin a ni.
Mo lawi dan han sawi leh ila.
Kan khuaa kan tih dan ka sawi ang a. Zanah hian mo a lawi thin a ni a. Keini thingnawi fawm naupang hian mo lawi turte theh nan se-ek leh chirhdiak kan lo chawhpawlh lawk a, an kal kawngah kan lo chang a, an lo kal tham tham chu kan lo vawm ta thin a, an rak tuar tuar thin. Anmahni vengtu atan Lawichal, pa pakhat hi a awm thin a, min han um a, kan han tlan darh cham cham a, kan um leh thin a ni. Ina an luh dawna tuia lo leihtu tur inchungah tuium nen a lo thu ran mai a. An lut tur chu a han leih a, an rak chul thin a ni. Nuam ve deuh mai asin. Zan khatna chu ‘Lawi chhiat zan’ a ni a, mo chu a hawng leh mai thin.
Lawi that zan chuan Mo chuan chumi zana a pasal nen an sin atan puan thar tlem alo keng a, a thiante khan an kensak a. Mipui an tin hnuin tlangvalho an che ve thung a. Zawlbuk leh mo neitu in inkarah chuan vawkthleng hi an dah zawm zui thin a, Zawlbuk atanga mo neitupa chetla ngaithla tura kalte chuan kal pahin an vaw ri thin a. Mo neitupa kawmchhak bangah an bet a, an thawm an ngaithla a, in hnuaia lutte pawh an awm a ni awm e. Sum hmuna arbawma arte an chhuah a, kawngka chu pawn lamah sukin an kalh bur bawk a. A chang phei chuan mo neitu kha sutah an tawn bet a, chu chu a nupuiin a phelh tur a ni a. Chutiang thawm chu kawmchhakah an ngaithla a, an lo hlim ve hle thin a ni. Kan han tlangval hnu pawhin kan la ching a, mahse Kohhran hotuten min khap ta a ni.
Tlangvalin nupui a neihin a inah a riak mai lo, thla khat emaw lai chu Zawlbukah a la riak a, zan laiah a hawng a, zingah mi thawh hmain Zawlbukah a lo mu leh thin a ni.
Heng hi ka hmuh nge ka ziak a ni a, in awih lo mai thei.