Mizo tawng hi tawng awllai lo tak mai a ni a. Thuziak ziahzawm turte leh thumaldin te hi hriat an harsa em em mai a. Inzir zel a pawimawh.
Tunlaiah Mizo tawng dik a bo tial tial a, a diklo kara a dik zawk chhawm nun zel hi a hlu. Keini pawh inzir mek vek kan ni e.
Credit: Heng thute hi Facebook lama Van Lal Malsawma rawn ziah chhuah a ni a. A post-tu chungah lawmthu kan sawi e.
Table of Content – Thupuite:
1. Tih Zawk Tur
1. “Ka tui in a hal” ti lovin “Ka tui a hal” tih zawk tur.
2. “Ka muthilh a chhuak” ti lovin “Ka mut a chhuak” tih zawk tur.
3. “Khawmpui ka chhim” ti lovin “Inkhawmpui ka chhim” tih zawk tur.
4. “A khawngaih thlak awm” ti lovin “A khawngaih thlak” tih zawk tur.
5. “Test chhin” ti lovin “Test” emaw “Chhin” emaw tih zawk tur.
2. Awmzia Nei Vs. Nei Lo
Thuhnung bet leh thuhmabette hi a nih dan tur ang taka kan zawm loh chuan awmze dang daih an nei thei a. A ziah dan tur dik taka kan ziah erawh chuan hriat thiam a awlsamin awmzia a nei thin a ni.
Entirnan:
Awmze nei lo: “Ka duh a vang in ka lei” (He thuchangkima “Vang” hian “Thil vang (tlem emaw zawn hmuh har emaw) a kawk daih.
Awmze nei: “Ka duh avangin ka lei” (Hetianga kan ziah chuan kan duh zawng kan lei tihna a ni a, kan sawi tum tak a phawk chhuak a ni)
Chutiang zelin, thumaldin ni si, kan ziah zawm chuan awmze dang a nei thei.
Entirna: Chem te (Chawhmeh siamna chem te ang) ziah kan tum laia “Chemte” tia kan ziah chuan a awmzia a dang daih thei. “Chem te” chuan chem te tak te pakhat a kawk a, “Chemte” erawh chuan chem tam tak a kawk thung a ni.
3. Thupui: Na
1. ‘Na’ tih hi thuhnungbet (Suffix) a nih chuan ziah zawm vek tur a ni.
Entirna: Hmangaihna, Duhsakna, Ropuina, Khawngaihna
2. Tawng dang hnunga kan behtir chuan rin tawi (Hyphen) dah hnua belh tur a ni.
Entirna: Accident-na, Off-na, Record-na, 1-na
3. ‘Na’ tih hi thumaldina kan hman chuan a hranga ziah tur a ni.
Entirna: Ka lu a na, Na reng reng ka hre lo, I inkhawng na em?
4. Thupui: In
‘In’ tih hi thuhmabet (prefix) emaw thuhnungbet (suffix) emaw a nih chuan ziah zawm zel tur. Thumaldin a nih erawh chuan a hranga ziah tur a ni.
Entirna:
1. Thuhmabet: Inkhawmpui, Intihsiakna, Inbual, Intithei
2. Thuhnungbet: Chuvangin, Atangin, A vaiin, Hmangaihnain
3. Thumaldin: Tui ka in, In kan sa, Bawng in
5. Thupui: A
1. “A” hi thumaldin a nih chuan a hranga ziah tur a ni.
Entirna: A nui, A lian, A ei
2. “A” hi thuhmabet a nih chuan ziah zawm zel tur a ni.
Entirna: Atan, Avangin, Ahnehin
3. “A” hi thuhnungbet a nih chuan ziah zawm zel tur a ni.
Entirna: Chaw ka ei meka ka la hman lo, Khawia mi nge?, Krista tana nung
Exception: Thuhnungbet “a” dawt chiahah comma (,) emaw full stop (.) emaw a awm chuan thuhnungbet mah ni se, ziah zawm loh tur a ni.
Entirna: “Chaw ka ei mek a, ka la hman lo”, “Vanah a lawn a.”
6. Thupui: Te
A. Thuhmabet emaw thuhnungbet “te”
1. Pakhat aia tam kan ziah chuan “te” hi ziah zawm tur a ni.
Entirna: Mipuite, Naupangte, Zirlaite.
2. Pahnih aia tlem kan ziah chuan “te” hi a hranga ziah tur a ni.
Entirna: Mawia te, Sanga te, Zika te.
3. A tam lam chhiar theih loh chi a nih chuan ziah zawm tur a ni tlangpui. Nimahsela, “te” dawt chiaha comma (,) emaw full stop (.) emaw a awm chuan a hranga ziah tur a ni.
Entirna: (a) Hmangaihnate, Remnate, Duhsaknate.
(b) “Hmangaihna te, remna te. Duhsakna te.”
B. Thumaldin “te”
1. Thumaldin a nih chuan ziah zawm loh tur a ni a, a awmzia pawh a dang.
Entirna: Vawk te, A te ber, A ke a te.
7. Thupui: Ah
1. “Ah” hi thuhnungbet a nih chuan ziah zawm zel tur a ni.
Entirna: Tlangah a lawn, Biak inah ka kal, Vanah a lawn
2. Thumaldin a nih chuan a hranga ziah tur.
Entirna: Chhang ah khat, Eng nge i ah?
8. Thupui: Tu
1. “Tu” hi thuhnungbet a nih chuan ziah zawm tur a ni.
Entirna: Ziaktu, Sawitu, Vengtu, Zirtirtu
2. Thumaldin a nih chuan a hranga ziah tur a ni.
Entirna: Tu leh fate, Tu fa nge?, Kaihbu han tu teh
Note: “Tupawh” “Tunge” tihte hi tun hma chuan ziah zawm a ni thin a, mahse thang thar mithiamten a hranga ziah tur an ti leh a. Eng pawh ni se, a dik ve veah ngai phawt ang.
1 comment
A țha khawp mai!