Belbingtea (Belpataivawna) [Mizo Thawnthu]

Hrang ZahawmaThawnthuLeave a Comment

Belbingtea Sakei MizoThawnthu

Belbingtea Sakei MizoThawnthuThupui: Belbingtea (Belpataivawna)

Hmanlai hian tleirawl pakhat harh vang tak mai, huaisen zet Belbingtea an tih hi a awm a. Tuk khat chu, “Khawnge, khawchhak pawiho ka han run teh ang,” a ti a. A nu chuan, “Nangmah chauhin maw i kal ang?” a ti a. Belbingtea chuan, “Ni e a, keimah chauh pawhin ka ngam a lawm, ka nu,” a ti tlat a. A nu chuan chaw a fun sak a, a nu chaw fun leh chempui a ak a, a kal ta a.

Nakinah chuan Sanghar hi a tawk a, sanghar chuan, “Belbingte eng nge i tih dawn?” a lo ti a. Belbingtea chuan, “Khawchhak pawi ho ka run dawn,” tiin a chhang a. Sanghar chuan, “Ka lo kal ve ang chu,” a ti a, Belbingtea chuan, “I duh a thu le,” a ti a, tichuan an kal dun ta a. Rei pawh an la kal dun hman lo tihin Chinghnia hi an tawk leh a, Chinghnia chuan, “Nangni pahnih chu khawiah nge in kal dawn a?” a lo ti a. Belbingtea chuan, “Khawchhak pawi ho kan run dawn a,” a ti a. Chinghnia chuan, “Chuti anih chuan ka lo kal ve a nge,” a ti a. Belbingtea chuan, “I duh a thu le, lo kal ve rawh khai!!” a ti a. Chinghnia chuan a zui ve ta a.

An pathum chuan hmanhmawh lem lo tak chuan an kal ta a. Nakinah chuan Sakei hi an tawk leh ta a. Sakei chuan, “Nangniho chu eng nge intih dawn a?” a lo ti ve leh a. Belbingtea  chuan, “Khawchhak pawiho kan run dawn a,” tiin a chhang a. Sakei chu a ngawi vung vunga, a hnu deuhah chuan,  “Belbingte, ka lo kal ve a nge,” a ti a. Belbingtea chuan, “I duh a thu a ni mai e, lo kal ve rawh khai,” a ti vel leh ta a, tichuan an kal ho ta a.

Rampalailenga zan tam tak an riah hnuah Pawiho khua chu an thleng ta a. Pawi lalpa tualah chuan Belbingtea chu a han ding kak ta mai a. Pawi lalpa chuan, “Belbingte, eng nge i rawn tih dawn a?” a lo ti a. Belbingtea chuan, “E le, ka rawn run dawn che u,”  a ti a. Lal chuan, “Chuti tea i tih rawk rawk, min ngam dawn em ni?” a ti ta mai a. Belbingtea chuan,“Ngam tuk e a,” a ti ve ta khar khar a. Pawi lalpa chu a inhrosa kuk kuk a, Belbingtea chu a diau duh bik hlek lo va, a inhrosa ve khar khar a. Lal chuan, “Chutia min run dawn chuan ka arpui kawlh sual huai ber mai, Belbingtea hi lim hrep rawh,” a ti ta khur khur mai a. Chu ve leh arpui kawlh chu a tlatna inhnuai atangin a rawn tlan chhuak a, Belbingtea chu lim tumin a rawn inti puk a, a rawn lim dawn ta mai a. Arpui kawlhin a rawn lim dawn takah chuan Belbingtea chuan, “Ka sanghar, arpui hi la rawh,” an ti a. Chu ve leh sanghar chu a bihrukna hmun atangin a rawn tlanchhuak a, arpui chu a la ta daih mai a. Daipawnah a tlan pui a, tui ti takin a va ei zo ta vek a.

Pawi lalpa chu a thin a rim ta hle a, a kelpui kawlh, ui pawn a ngam loh hnenah chuan, “Ka kelpui huai ber, Belbingtea hi tauh rawh,” a ti leh ta a. Kelpui chu a riah thinna sumhmun atangin a lo tlan chhuak a, a rawn ter ta at at mai a. Chutah le!! Belbingtea chuan, “Ka chinghnia, kelpui hi seh rawh,” a ti ve leh ta thung a, chu ve leh chinghnia chu a bihrukna thingbuk phen atang chuan a lo tlan chhuak a, kelpui kawlh chu a rawn zuan thlu ta tawp a, dawipawn lamah a hnuk ta hawn hawn mai a, a sa chu tui ti takin a ei ta bawrh bawrh a.

Pawih lalpa chuan lunghnur takin a thlir zui ta vawng vawng a. A sialpui kawlh hnenah chuan, “Ka sialpui chhuanvawr, Belbingtea hi si rawh” a ti leh ta a. Chu ve leh sepui kawlh chu se huang atang chuan a lo tlan chhuak a, Belbingtea chu a rawn si dawn ta mai a. Chutah le, Belbingtea chuan, “Ka sakei, he sepui kawlh hi seh rawh,” a lo ti ve leh ta thung a. A awmna hmun atangin sakei chu a lo tlan chhuak a, sepui chu a rawh seh a, sepui chu a awn ta rawng rawng mai a.

Belbingtea pawnpui

A tawp a tawpah chuan Pawi lalpa chuan, “E khai!! Belbingte, kan ngam lo che a ni e, eng nge i duh le?” a ti dam ta duai a. Belbingtea chuan, “Thil dang tehchiam ka duh lo ve, pawnpui chhia, samkhuih chhia, saum leh chingal mi pe ula a tawk mai e, “ a ti a. “I va duh tlem si ve” an ti a. Pawnpui chhia, samkhuih chhia, saum leh chingal chu an pe a, Belbingtea chu a kal leh ta .

Khua te a tlai tawh avangin a thim dawn ta mai a, riahna tur remchang hmu mai hek lo, Belbingtea chu puk pakhatah hian a riak ta ngawt mai a. Chu puk chu ramhuaiho puk a lo ni a. Tlaiah chuan ramhuaiho ram kal chu an lo haw ta a, an puka mi awm chu an rawn hmu a, an pawh mai ngam bik lo va, an hel an hel ta mai a. A huasen fal deuh chuan puk ko tlang atangin an bih dek dek ngam chauh a.

Ramhuaiho chuan pawh mai ngam hek lo, an puk chhungah chuan luh an duh si, hmawlhin an va hawlh de de a. Belbingtea pawnpui chhe sin chu an va hawlh fuh a. Belbingtea chuan pawnpui pawr hmul them leh saum a lo tat a, rang takin hmawlh chu an pawt leh leh ta vat a. An hawlhna hmawlh chu an han tuai let vat vat a, a hmawr a pawnpui hmul them kai chu an han hmu ta a, “E khai aw…a hmulte chu a van hraw ngai ve le,” an ti a, an han hnim dan dan a, uih an ti hle hlawm a. “E khai, a hmul te chu a hraw hraw nen a van uih ngai ve le,” an ti leh laih laih a. “Eng ang sa nge ni ngai ang le” tiin an inzawt dan dan a, tuman an hrechhuak zo chuang lo va.

An zinga huaisen ber an inthlang chhuak a, an puk chhunga ramsa danglam tak awm chu va chian ngei turin an intur lui ta a. Puk chhunga lut tur chu an in hmu thei lawk lo nghe nghe a. An zinga huai ber chuan tlawmah a la ta deuh a, a inti pachang a, puk chhungah chuan a lut ta a.

Belbingtea chuan samkhuihah chuan saum leh chingal a tat a, puk chhunga ramhuai zinga huaisen ber rawn lut tham tham chu a lo en kiau a. A bul a rawn thlen chuan rang deuh maiin ramhuaipa hmaiah chuan samkhuihin a lo ziat ta tawk mai a. Chu ve leh ramhuaipa chu bak lengin a tlan chhuak a, a hlau lutuk chu a khur zawih zawih mai bawk a. A thiante chuan “Engtin nge a lo tih che?” an lo ti vat a. “Awi, awi, awi, ka hmai hi han en teh u, engtin nge a awm, a thip huai huai mai” a ti a. A thiante chuan an han en sak vat a, “E khai! ! a hmul hraw hraw nen a ha hnu chu a van sin ngai ve le” an ti a. A then chuan an thianpa hmai chu an han hnim vel a, “A khai aw!! A sehna a la rei loh tehlul vei nen le, a uih hman tawh a nih hi,” an ti bawk a. An hlau ta hle mai a, puk chhungah chuan an lut ngam ta lo va. An kal darh ta vek a. A tukah chuan Belbingtea mu tui lai chu a rawn harh a, puk chhung chu a han bel chiang ta a. A rin loh leh beisei loh deuhvin ramhuaiho ro thuhruk chu a hmu ta teuh mai a. Bawmrang a tah a, ramhuaiho ro chu a zawh tawk a phur a, a haw ta a.

Source: Zofa Run (edit tlem nen)

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Leave a Reply

Your email address will not be published. Required fields are marked *