Original web article: zoin.info
Vulmawi Lamlian
By: Zodin Sanga
American rock band Eagles in an album pangana, khawvel dengchhuak, Hotel California an tih chhuah kum 1976 khan Mizo chuan kan rimawi album hmasaber kan nei ve chauh a. Don Henley leh a thiante Los Angeles-a recording studio thabera thuam famkim nena an rik laih laih lai vel bawk khan Tahan Mizo tlangval lubuk intelkhawm chuan rimawi tumna hmanrua pawh nei mumal lovin Mizo album hmasa ber tur chu Mandalay-ah an lo sual ve laih laih a ni……
Vulmawi zingah….Lead Butta
Tahan Mizo band Zodi din tan kum tho 1976 khan Mandalay-a lemziak zir zo, kum 22 vela upa Lalbuta, a hnua “Lead Butta” tia Zoram Khawvel dengchhuak ta chuan Zodi-a tello ho musician a tuk khawm a, Vulmawi hi an din a ni. Hemi hma hian Butta nau Siama leh Lalruanga leh a nau Hmingliana te hian an hlaphuah te sain Falamah tualchhung tlangval zaiin an lo zai ho ve dal dal thin a. Member dang pahnih, Zara (drummer) leh Salai Tawna leh Rihlipui Nghaka (Ronghaka) te nen band mumal takin an dingho ta a ni.
Aizawlah chuan rock band dintute hi mi awmthei fa an ni duh tlangpui. Tahan lamah erawh chuan rimawi lam luhchilhtute chu, Los Angeles leh England lam ang bawkin sum lama harsa ve tak an ni hlawm. Vulmawi hming invuaha Tahan Mizo tlangval rual, Butta leh a thiante pawh an hausa lo hle. An zingah Lalruanga te an awmthei deuh a, chu chu an innghahna ber a ni mai.
1972 vel khan Butta hi Zodi guitarist T Zorampela te nen Ainawn hmingin an lo ri ve laih laih tawh thin a, chutah chuan Butta’n bass guitar a perh thin. Chutianga sulhnu nei sa an nih bawk avang chuan Vulmawi chuan album pakhat daih hla pawh karlovah an nei nghal mai reng a. An indin kum 1976 chawhnu lamah chuan Mandalay-ah an album hmasaber siam tumin sum nei miah si lovin an tei lut ve ta rawih a ni. “Lalruanga’n a chhung leh khat te hnenah kut a dawh a,chumi hmang chuan recording kha kan ti ve hram hram a ni, ” tiin Butta’n a sawi. Tahana Lalruanga’n “fund raising campaign” a neih lai hian, Butta leh midang te hi Mandalayah an lo inkulh ve thung a.
Vulmawi Mizoram Concert 1981
He tih laia an harsatna leh rualawhna nasa lutuk avang hian alawm Butta’n Mizo lenglawng hla mawi ber pawl te zinga mi Ka Nuam Ve E tih hla hi a phuah tak nghe nghe ni. Sapram-a rock guitarist tam tak ang bawkin Butta pawh hian guitar hi a bengin a zir a ni. Kan naupan laia an sawi thin, “Butta te ho chuan ulawng solfa* an thiam em a ni,” an lo ti ngawt thin kha a lo ni lo deuh a nih hmel. A college kalna hi music leh fine arts zirna a ni a, fine arts chauh a zir. (* staff notation).
“A hnu deuh khan music zir ve leh hrim hrim ka rilruk a. Mahse, Jimmy Page (Led Zepellin) guitar solo te pawh kan tih ve zut zut theihtawh hnu-a, ‘E chord chu he’ng note te’na a siam hi a ni,’ tia a bulte atanga zir leh kha ka peih vel vei lo a, ka zir ta lo,” a ti. Mahse, a naupan lai a\ang renga “naupang tingtang perh thiam” tia an sawi huai huai a ni thung.
Raldawna Leh Tumchhingi
Tichuan, a daih tawk chang chang sum an khawn ngah hnuin Myo Thant Studio-ah chuan an han inzui lut ve ta rawih a. Hollow guitar leh drum atan herhsawp leh dawhkan mai mai hmanga hla zir thin an nih avang chuan studio-a fender guitar an han hum ta thut leh thian te hmel pawh inhmu thei lova pindan hrang hranga an han play ta chu an enlawk laia an tih ang khan an ti thei ta hauh lo mai lehnghal a. Chutachhapah, an sum tlin tawkin ni hnih chhunga thun zawh ngei ngei a ngai a, tih that (second take) pawh a awm thei meuh lo. Chuvang chuan Vulmawi hian an album hmahruai Raldawna Leh Tumchhingi hi an chhuang lo hle a, tlangzarh lohva, hup bo mai an tum laiin an thianpa pakhat thahnem ngaiin a lo thehdarh sak a ni. Chuti chung chuan Vulmawi hian hriat an hlawh phah hle a. He albumah hian Ka Nuam Ve E bakah, Lalruanga Duhaisam te, Nuihlimi Mittui te, Tha Dumdangi te leh Piangthar Nunrawng te hian mite hriat an hlawh khawp tho mai.
Tun hnua Zofate zingah music-a Ph.D nei awmchhun, Salai Tawna hi an recording tih laia Mandalaya a awm remchan avanga an pawh chawp ang deuh chauh a nih avangin a tel chhunzawm ta lem lo a. Tin, hetih lai hian ama band ABC (Amawi Ber Chinram) tih kha Rangoon-ah a nei sa hrim hrim a. Ani hi Thawngnova’n a rawn thlak ta a ni. An album pahnihna Parmawi Rimtui an record khan Rangoon-ah a awm a, an pawt chawp leh a, kha albumah khan ahlaphuah pakhat Zomawi Rihlipui tih kha a sa ve leh tho a ni. Tin, Zara pawh “Drummer Zothana’n” a thlak bawk. Rihlipui Nghaka pawh an album pahnihna Parmawi Rimtui-ah chuan a tel ta lo. (Tawna pawl ABC hian ’80s chawhnu lam khan Zosangliani leh C Luri te album an siam pui)
Parmawi Rimtui a Leng Vel
Tichuan, electric guitar leh hmanraw dang te hawh khawm chawpin Vulmawi ho chuan hmalam an pan ta zel a. An album pahnihna Parmawi Rimtui chu kum 1981 September thla khan Oasis Studio Rangoonah ngei an han thun ta a ni. He album zet hi zawng a hit chiang hle. US leh UK te angin chart te kan nei ve lem lo a, chutiang chu nei ta ila, an album hian number one a kai chiang hle ang a, tin, single in ti chhuak ta se an hla ho hian top ten singles chart a luah khat vek ngei ang. Mizo rimawi album ropui ber te zinga chhiar tel ngei tur chi a ni.
Hemi hma kum 1981 tho hian gospel album Agape Hlamawi an siam a, mahse a lar vak lo. Parmawi Rimtui album avang erawh chuan Vulmawi chu Zorimawi khawvelah an parchhuak ta nghal a. Kum 1981 khan, Zofate inpumkhatna atana thawh hlawk tak, Mizo Zirlai Pawl chuan Vulmawi hi Mizoram dung leh vanga zaizinna (tour) nei turin an chah ta nghe nghe a ni. Hemi kum hian Vulmawi chuan zaiin Mizoram dung leh vang an fang ta a, Mamit tih loh khaw lian zual chu an tlawh deuh vek a ni. Butta sawi danin, khawtinah khan kar khat zel kha inzawm zatin 
concert an nei a. Heng concert zawng zawng hi “sold out” vek a ni. “Kolasib-ah phei chuan,” Butta’n a ti, “khua a lum bawk nen, mipui an khat hneh si a, mipui thlan hu chhuak kha inchung rangva atangin a rawn far fup fup thei.” An record hi zaithiam leh band tumahin an khum ta lo niin a lang.
Sawi tawh thin angin heng hunlai hian Aizawlah rock band engemawzat an awm tho a, mahse Sap hla deuh hlir an sa a, mipui nawlpuiin an ei phak lo. Mizotawng ngei maia, chutih hunlaia khawvela altu rock music, Mizo rilrem zawnga kaihnem hmanga Vulmawi-in mipui an han hrai kha hlut loh rual an ni lo reng a ni. Tin, dawhsana chetvel (stage performance)-ah pawh Vulmawi ho kha The Who, Led Zepellin, Deep Purple te nen pawh khaikhin tham an ni ve hial asin. Chutih lai chuan video camera te an hmuh phakah a awm lo hrim hrim a. An hunlai hmu phak te sawi danin an nep lo a ni. Still camera atang ngawt pawh hian an ding mai mai lo tih chu a hriat reng alawm, hei! “Lalruanga palian bawk si, inzuah buk chhup mai si leh, kawrfual tial riai ruai ha zur mai bawk sia stage a han tlan kual vel ringawt pawh kha a music tello paw’n a hmuh nawm hrim hrim,” tiin an concert en ve phaka upa Lalmuanpuia Punte in a sawi. Lalruanga kha khawthlang rama rock star ho chet dan tak tak ang kha a chet duh dan a ni a, zawng luruh ro te pawh awrh thinin an sawi. Chung hunlaia nu leh pate khan lo hrethiam lo viau pawh ni se, a awm tho mai. Mahse, Lalruanga hi chutih hunlai pawh chuan sakhaw mi tak leh zu pawh tem hlek lo niin a thiante’n an sawi.
Josefa hrelo thangtharte’n Rosangliana (Zorock) hnena “Father of Mizo Rock” nihna an lo hlan tawh si chuan, Vulmawi ho chu “Grandfather of Mizo Rock,” kan ti ve mai a niang chu. Zorock kan sawi nep ni lo se, hmahruaitu a ni lo tih erawh kan pawm ngam a ngai. (Jimi Hendrix hnuah rock guitarist ropui tak takan lo chhuak tawh a, mahse hendrix-a dinhmun an chhuh thei lo ang deuh a nih chu).
Ti teh fo ila, US leh UK te ang a, album pakhat hlawhtling leh chumi umzuina zaizin (tour) hlawhtlin bawk avanga millionaire nih theih ni ve sela, Vulmawi ho khan eizawnna dang dap ngai lovin rimawi lamah kha aia thui kha min thlenpui ngei ang. Mizo kan tlem lutuk hi, arts, music leh literature lama talent nei tha tak tak te tan hian a pawi mang e!
Nuihhlimi Mittui
Mizorama zaizinna an neih chhung hian lawmna leh lawmlohna te pawh an tawng nual a ni awm e.An bul tanna, Aizawl Lammualah chuan a organiser MZP te’n sound system chungchang hre vak hek lo, microphone tam zet mai leh speaker te reuh te te an lo remkhawm ve dul mai a. An che fuh lo hle.”thian te zai ri pawh a hriat that theih loh a. Hla pakhat kan sak laiin, solo pek hun tawha ka ngaihah ka han pe thuai mai a, Hmingliana lo la ang bai bai kha ka va hmu leh sia, kan inman lo khawp mai,” tiin Butta’n a sawi.
Mizo thalaite zinga Guns N Roses guitarist Slash-a’n Les Paul guitar a tihlar hma daih khan Butta hian Mizoram tour-ah hian Les Paul a lo chawilar daih tawh.Lungleia tour an neih lai tak kha Kawnpui Bus Accident Rapthlak (July 7, 1981) thlen lai kha a ni a. Lunglei-a an concert zan hnunhnung bera an hlep hi a bo a bang awm lovin bus accident tuar te chhawm dawlna’n CM relief fund-ah an pe vek a, Rs. 3000 leh tlem a tling a ni. Chung hunlai chuan a tam tham ve khawp ang.
Champhaiah thil duhawm vak lo a thleng bawk. Champhai an thlen hian bar thla a kai tawh a, khua a vawt vur tawh. Intih lumna’na mi pasarih tana rakzu um khat an lak chu Zu Do Pawlin an lo hria a,Vulmawi member ho chu hmun pakhat “Golgotha” an tih hmunah an hruai a, chutah chuan an hlap ta hrep a ni. Zu tem miah lo Lalruanga phei chu a rilru a na hle awm e. Tichuan, Mizoram tour chu mittui nen rilru nain an thlah ta thung lawi a ni. Vulmawi hla Hei Mai Mai tih kha Champhai thil thleng nen hian sawi zawm a ni thin a, a dik lo. He hla hi chu hemi hma Parmawi Rimtui albumah an dah daih tawh. Amaherawh chu, hetiang deuh chi tho Falam lama thil thleng a ni awm e.
A Chuai Mai Mai Dawn Lo
Vulmawi album pathumna leh a hnuhnung ber Kawl A Eng Tan Ta tih hi kum 1982 March khan May Studio, Rangoon-ah an thun leh a. Hetah hian Vulmawi signature song Vulmawi tih kha a tel a, studio version leh live version an dah nghe nghe a. Mizo album-a live version awm hmasa ber leh awmchhun a ni awm e. Tin, tunhnua Rangoon nula Pante-i’n a rawn sak lar leh Maphasy kha a tel bawk a. Kha hla kha Saiha an tour nei zovin an phuah a ni. Mara unaute tan liau liau a nih chu .Parmawi Rimtui erawh a tluk zo ta lo. Parmawi Rimtui-a hlate hi Mizo rilrem zawng taka rock kaihnem a ni a. Album hming tumtu hla Parmawi Rimtui hi Beatles hla Something zula siam a ni e tih mai lovah chuan an hla-ah te hian originality tha tak kan hmu a ni.
Tun hnu-a Tribal Power in anmahni version an cover Chhingkhual Di phei hi chu a hunlai chuan lar vet vet tak a ni. He hla-a guitar solo hi Butta signature solo a tih ngam a. Butta guitar zut no zia an sawi apianga hahipa an sawi thin chu he solo hi a ni. Hetah hian frenger effect a hmang a ni awm e.Heng hunlaia All India Radio-a an Mizo hla ngaithlak thin chu hollow guitar pakhata rem tleng tleng chi, tun hnua Leihkapui Zai an tih tak ang deuh hlir kha a ni a. Vulmawi ho hian revolution rilru puin Mizo hlaphuah dan an rawn her dang lam dawrh a. Hla thu atan pawh, tawng upa an hriat loh vang ni lovin, thu mawl te te, khawlai tawng tualleng te an rawn hmang ta a ni.
Parmawi Rimtui hla erawh hi chu hi Zorampela Duhaisam Then Hnihna ang bawka tehkhin thu hmanga (allegory) Zoram independence auhna hla a ni. Zofate hian zalenna chu ‘Parmawi rimtui angin thliak ve ila,’ a duh a ni. ‘Kan hma-a kal ta te’ a tih hi independence lo nei tawh ram te a ni. Burma sawrkar thikthu a chhiat thin em avangin ‘Parmawi Rimtui’ ang zawnga sawi a tul a nih rualin hetia tih hian a hla mawina tizual hle a ni. (A tir lama kan sawi Hotel California pawh hi eng an sawina nge tih tun thleng hian an la inrin siak vel mai mai a ni)
An hla te hian guitar intro mawi tak an nei deuh vek a, abikin Suihlung Leng Ve Ang Maw intro hi Butta hian a ngaihtuah rei ve hle awm e. Zomawi Rihlipui intro te nen hian kum 30 liam tawh hnu-ah pawh a la nalh reng a nih hi. Lalruanga leh Siama hi an hla kungpui an ni deuh a, an hla phuah Chun Leh Zua, Nuam Ngai Em Ni, Rem Ang Maw leh A Rem Lo Maw tih te hi a hlui lo a thar zel \hin tih ang mai a ni e. Zomawi Rihlipui hi Zodi hla Khampat Bungpui ang deuha Mizo tobul tichiangtu hla a ni a, a thu a \hat bakah a thluk pawh a mawi hle a ni.
Parmawi Rimtui tour zawha Kawl A Eng Tan Ta album an tih chhuah leh hnu leh Burma ram hmun hranga hranga tour an neih hnuin, kum 1983 kum laihawl vel khan Falamah an zai leh a chu chu Vulmawi anga mipui hma-a an inlan hnuhnung ber a ni ta. Concert pawh tum 200 dawn lai an nei hman a, Burma sawrkar paw’n sawrkar programme-a zai tura an sawm bakah, Mandalay University-ah kum 1982 khan Chin National Day (February 20)-ah an inlan bawk. Chumi hnu chuan eizawnna hrang hrang dapin mahni seh seh mualah an liam darh hlawm ta a. Mahse, zofate tana an sulhnu hnutchhiah erawh, Lalruanga hla sak ang hian, “A chuai mai mai dawn lo” a ni. Zorimawi khawvel tana kawngpui zau tak an lo sial avang hian, Vulmawi chu chhuan tam ral hnu pawhin a vul mawi zel dawn a ni.
“Vulmawi Lamlian sialna zau
Chuai mai lo tur belhchian dawl
Kawng ngil rawn zawhtute u
Hlim leh lawmin chibai kan buk a che u
Siama, ex-Vulmawi, Duh Lohte Nena Khuangchawi (solo album)
source: ZOlife magazine, May-2011, pics: FaceBook
original web article @ zoin.info