Mizo Tlawmngaihna.

He thu hi thu ropui tak a ni. A huam zau ngei mai.

Taihmak te, huai te, chhel te, thilphal te, ngilneih te, mahni hmasial loh te hi a huam vek a. A hming ngawt pawh hi a mawi a ni. Hei hi hmasanga pi leh pute ngaihsan ber pakhat a ni.

Nu leh pate’n an inchhungah an fate an zirtir ber a ni ve a. Mizoram hian heihi a uar em avangin Mizoram timawitu ber thin chu tlawmngaihna hi a ni. Chhiatni thatniah mi tlawmngai thiltih hian a timawi a a tinuam thin.

Tlawmngaihna hi a hre ve ngai lo tan chuan dawt sawi anga ngaih theih an ni, an tih apiang chu chak vanga ti angah an ngai a. Miin ei tur pe dawn sela “Ka chak lo ve” an ti a, an rilru tak chuan an chak hle a. An ril atamin an tui pawh a hal hle a, nimahsela an tlawmngaihna avangin an eiin an in duh lo mai a ni.

Khasi rama kan Mizo tlangval sikul lutte chuan mi an thihin an thlan an lai thuai thin a. Khasi thenkhat chuan “Mizo chuan thlan laih hi an chak zawng tak a ni” an ti hlauh mai tih thu an sawi thin. Thlan laihte chu a chakawm loh, nimahsela tlawmngaihna tha tho takin an lai a ni.

Mizo fate hi naupan tet atangin tlawmngaihna an zirtir thin. Mite thilpek apiang an la tur a ni lo. Miten ei tur an pek apiang an ei tur a ni lo.

Tlangvalte Tlawmngaihna

Chhuahvahnaah upaho leh tlangvalte an chhuah chuan upate engmah an tihtir tur a ni lova, an awltir zel tur a ni. Tirh kher ngai lovin a tul awm apiang an hre nghal tur a ni. Rama an va riah te, tui chawi te, thing fawm te, chaw chhum te, chaw ei siamte tlangval tum vek a ni. Thil engemaw insem tur a awm leh upain an thlang hmasa zel tur a ni. Upa an phur a rih deuh chuan an chhawk tur a ni. An dam mang loh leh an hnungah an chhawm a, zawn ngai a nih leh pakhat zualkovah an tlan thuai a, pakhat talin an lo awmpui ang a, zawntute an lo thlen hma chuan an lo enkawl thin.

Chhuahvaha tlangvalho chetla hi upate hian an en ru reng a, tlawmngai bera an hriata kha chawimawi ve an duh a. Zu hmunah emaw amah kha tarlan an duh a, a tel lo chuan zu chu an in duh lova. Amah kha tangkapui ropui tak sipai huaisenten Victioria Cross an hmu ang hiala ngaih ropui a ni.

Mitthi emaw damlo emaw zawn tur lo awm sela tlangau aw an hriat veleh zanlai pawh nise ruah pawh sur se au awmna hmun atangin an tlan nghal a. A zawntu nih an tum theuh avangin an inchuh vak thin a, achang phei chuan damlo thenkhat chu an tichau zawk thin. Khaw dangte nen an inchuh a, kawng lakah te nasa takin an inbuan a, chak ber khua nih an tum a. Damlo awmna khaw thlenga an zawn luh phei chuan chu mi khaw tan chuan zahthlak tak, tlawmthlak a ni a, chuvangin kawng chanveah emaw lo lak sak an tum ngei ngei tur a ni. Inzawn avangin khaw thenkhatte chu lalte chenin inngeih loh phah nan an hmang a, Mi zawn leh tur awm teh se an ti a, tlangvalho hi an inkau reng thin.

Tlangvalte Ramchhuahna

Ram chhuahnaah emaw, vai zinnaah emaw tlangval kal sa rau rau zingah pawh tlawmngaih chhuah tumin an inel tan a. Thiante thawh sa ei chu zahthlak a nih avangin ram lamah pawh chaw chhum an tum a, atuk zingah an thiante thawh khalh an hlauh avangin achang chuan zanlaiah an tho va, aruk tein mei an chhem a, tui an chawi a, chaw an chhum a, an peih diam hnuah chuan an duh leh an mu leh mai a. Han thawha thiante siam peih sa diam han ei chu a zahthlak hle avangin hun dangah chuan chhum ve tumin thuk bulah an mu ve tlat tawh thin a. Chaw kilnaah pawh upain a bar hma loh chuan tlangval chuan an bar hmasa tur a ni lo, chawhmeh pawh upain an lak hmasak hma chuan an la hmasa tur a ni lo. Tlangval chu an kham hnuhnung tur a ni lo. Ei ran, kham hma hi viak tha tlawmngai chhinchhiah a ni.

Khawi ilo chhuahvahnaahte tlangval emaw lo inhliam awm sela na lo anga tuar an tum a. “Ka na lo ve” an ti zel a, zawn pawh tum lui mahsela an kal theih hram hram phawt chuan an duh hauh lo. Nimahsela tlawmngai mi bawkin dam lo chu an enkawl a, an chhawm reng reng thin. “Mel khat kala phut luitu apiang che hnenah chuan mel hnih kal rawh” tih Lal Isua zirtirna hi lo hre lawk ang an ni.

Zualkova Tlan

Hmasangin chhungte leh thiante lehkha inthawn a awm ve lova, lehkha leh lehkha tlanpuitu ber chu tlangvalte, mipa naupangte an ni a. Khaw khatah damlo emaw mitthi emaw awm sela a chhungten khaw danga an chhungte koh an duh chuan tlangval hnenah emaw mipa naupang hnenah an duhchhan an sawi phawt chuan rang takin an insiam a, an tlan nghal thin. Tin an chhungte hnenah chuan a rang thei ang berin an va thlen a. Mitthi chanchin va thlen tur an nih phei chuan “A na hle a ni awm e. Nimahsela chah zawng a la chat em lo ve” an ti a, rang takin an tlan chhuahsan lehnghal mai thin. Ramhnuaia awm lai pawhin zualkova tlan ngai a nih chuan aia upate thu nghakin tlangval emaw naupang emaw chu an inkau sa reng a, tlan tul an tih veleh rang takin an tlan nghal thin.

Nulate Tlawmngaihna

Hmeichhe fa hi tuium hnih zo an nih atangin inchhung lamah chet fel an nuten an zirtir tan a. Tui chawi, thing phurh, buh den, buh thap, chaw chhum, vawk chaw pek, ar lawi an ti vek a. Chu chauh ni lovin an nu leh an pate hnathawh hlauin nau an neih chuan an awm a. Awm maimai hun reng reng an nei lo. An hun awl dangah themlem an nei a, puan tah an zir bawk a. An lo tleirawl a, in lam sekrek zawng zawng an nute thawh ang an rawn thawk ve a. Mipa fa hi chu ram lama an chet loh chuan in lamah zawng inchhung hna engmah an khawih lo.

Tin an lo nula a, an nu leh pain lo lamah hnathawkin an chhawr ve leh ta nghal a. Fehnaah chuan tlangval lawm an lo nei a, an lawmpate buhfun leh tuthlawh te an phurh sak a. Tin tlangval puan bal te an suk sak a, a tette an thui sak thin a. Feh hawn kawngah pawh an lawmpate thuamhnaw zawng zawng hi an phurh sak thin a. Zanah tlangvalin nula an rim chuan nu leh pa chuan khumpui bul chuh lovin khumlai lamah emaw chhuatlaiah emaw dawhthleng bulah emaw an thu deuh ber a. Nula chu zanah pawh an awm mai mai lova, vawk chaw chhum pahin la an kai a, achangin la an hlum a, achangin an sai bawk a. Nungchang that leh la deh thiam chu an zirtur pakhat a ni a. Achangin tlangval tam tak an leng a, arualin an haw kher lova, a hawng tur apiangte chu nula chuan “In va hawng hma ve la leng rih rawh u” tiin tawngkam thain an thlah zel a. Tlangval bengvar lo deuh thenkhat chu chhuatah an lo muhil a, zanlai thleng rak pawhin an lo muhil a, nimahsela nula tlawmngai tan chuan kaihthawh dan a ni lova, an mut chhuakin mutthlu mutthlu mahsela an meng tan tan a. Nakinah tlangval chu lo thovin hawn tum sela nula chuan hmel hlim lo pu duh hauh lovin, “La leng rih ta che”, an la ti tal a.

Reiloteah khuan hmasa a lo khuang a, an han mu a. Thangkhat emaw chauh an mu hman a, zing thawh a hun mai a, mei an chhem a, zing tui an chawi a, an lo hawng a, buh an deng leh a. Achang phei chuan chaw chhum nen an fawm tur a ni. Hmanlai phei chuan feh chhuah hun hi zing tak a ni. Ni chhuah tirh vel hi tukthuan ei hun a ni ber a, chumi ei zawh veleh chuan feh turin an chhuak nghal thin. Hmeichhe fa hian awl hun an nei lo tak tak a. Ram lama nula vak chhuak chaw eite hmuh chuan “Engtinnge heti taka thawk hah si an dam theih?” tih tur an ni. Ei bawrh bawrh hi tlawmngai lo chhinchhiah, thil zahthlak a ni. Ei tlem theih ber hi an tum a. Nula tlawmngai, taima leh nungchang tha chuan tuibur pawh an zu chawt tur a ni.

Mitthi Neih Nikhuaa Tlawmngaihna

Khuaah mitthi an awm a, feh tur an khalh phawt chuan nausen hlamzuiha thi an nih si loh chuan mi zawng zawngin awm ni kham tur a ni. Mitthi inah chuan a thenawm nu leh pa leh veng hla deuh ami nu leh paho chu an tlan lut a. A chhungte leh lainahote chu mitthi ruang bulah an thu thin a, tap thei an tap a, mi naran inchhunga leng lote kha pawn ler thlengin an thu thin. Mitthi chhungte an nih ngawt loh chuan naupangte, nula leh tlangvalte chu an awm lo. Tlangval leh mipa naupangho chu thlan buatsaihin an liam thuai a, tlangvalin thlan an lai a, naupangin khaukhurhna tur thingtuai emaw lung emaw an pu a. Nulain thing an khawn a, tui an chawi a, mitthi chhungte tanpui an tulna apiangah an tanpui thin.

Tin mitthi thlaichhiah nan sial emaw an talh a. A sa ei tur hian tlangval thlan laite kha an ko ngei ang a, nimahsela tlangval tan zahthlak angah an ngai a, ei loh kha tlawmngaihna zawk a ni. Tunlai chuan, “Thlan laite hraina” an ti ta zawk mah a, tlangval pawhin an ei hreh ta vak lova. Tin mitthi inah chuan nute pate khawhar lenpui tur chuan an lut a, zu te an pu lut a, khawhar zaite sain an inkawm thin. Naupangte nen an inchiah piah nuai ngai lo. Amaherawhchu tlangval hovin an riahpui tur a ni. An inthen hma loh chuan khawhar lenpui te, inriahpui te a ni ber a. Mitthi hi an thih achin thla thum chhung chu an thlarau hi mahni in lama la chengin an ring a, chuvangin chaw an kil apiangin an thutna tur hmun an kian ve ziah thin a. Hemi chhung hian mitthi chhungte hi an inthawi thiang lova, chuvangin thenkhat chu rei lote chinah pawh an inthian mai thin. Chumi chinah erawh chuan mitthi khan mitthi khaw lamah a pan tawh ang. Tin inthawite a thiang tawh ang a, an tlangval in riakte pawh khan an riah bosan leh tawng ang a, inleng te, raltute pawh an awm lo tial tial thin.

Hriselna

Hmanlaiin nula leh tlangval hian natna hi vantlang hriatloh theih loh a nih ngawt loh chuan an sawi duh hlek lo. Hrisel lo nih an duh lo. Nupui pasal inzawng kawngah hian an fimkhur em em thin a, natna benvawn te tak te nei pawh an inlungten a, an innei duh ngai lo. Mite hrisel lohna emaw an bawlhhlawh emaw kai hlauvin vaibel leh tuibur zuk pawh an intawm duh lova. Mi hnam hman lai pawh an hmang duh lova, mi sahriak thih lai leh sam khuih hmanlai pawh an tawm duh lo. Chuvangin kan pi leh pute kha hri tha lo vei kawngah chuan an lo thianghlim hle mai.

Thute hi chhiar awlsam zawk theih tura remthat an ni.
Thulakna: Hmasang Mizo Awmdan 3rd Edition, 1956