USA: Motor Accident a Tih Dan Tur

Motor lo accident ta la tihtur I hria angem? An thiamloh ni mahse I thiamloh ti tlat ta se?

USA ah kan awm. Motor tha leh a mawi khalh kan duh. Driver license neih thuai kan chak. Chutih rualin, engtik lai pawha thleng reng, kan chunga thleng ve thei reng motor accident erawh hi chu ngaihtuah thamah kan dah lo fo.

Mahni fimkhur viau pawh hian vanduai avangin accident hi chu thleng thei a ni.

Motor accident hi chipchiar tak leh hautak hmel tak ni mahse a kalhmang I lo bihchiang ang. Mi tha lemlo te nena insut a awm theih avangin mahni invenna atana hriat tur pawimawh tak a ni.

Note: Heng thu ziak hi chiang takin I inhliam lo tih hriat hnuah chauh zawm tur. Inhliam nat chuanin 911 call hmasak ber tur. I call thei lo a nih chuanin midang call tir la, ambulance nghak ang che.

1. Himna a pawimawh hmasa ber

Insut leh inhliam belh a awm loh na turin hmalak hmasak ber tur. In insu na lo a, motor pawh a la khalh theih a nih chuanin, traffic, motor dang kalkawng atangin a sirah insawn a tha (an motor model leh license number chinchhiah nghal a tha bawk).

Motor a che sawn thei tawh lo a nih chuanin, emergency light tieng rawh.

Inhliam an awm em

 I motor chuan puite an tha em tih enfiah la. Chumi hnuah motor lehlam a chuangte an tha em? Emergency a awm chuan 911 call rawh.

2. Ka thiamloh a ni ti suh. I thiamloh a lawm ti bawk suh.

A thiamlo zawk chiang viau pawh nise. Chung chu police leh insurance company tih tur ah dah rawh. Sap tawngin, ka thiamloh a ni, “I’m sorry” ti suh (I thiam zawk phei chuan). I thiamlo tih pawmna a ni. Mizo inngaihtlawmna kha dah tha rih rawh. Lehlam driver nen mamawh information (chanchin) in inpek zawh a, hliam tuar an awmlo tih I hriat hnuah a tlem thei ang ber inbiak tur. Insurance claim leh police report hunah I thilsawi te I lakah hman a ni thei. Police leh insurance company bak hemi hun chhung hian biak loh a tha. Police hnenah pawh mamawh bak chu tawng tam loh a him ber. Titi mai mai, inkawmna hun a ni lo.

3. Police call rawh

Mi tamtak chuan police call an hreh. Mahni a tihfel mai an duh a, a hnuah buaina lian zawkin a tibuai leh thin. I insutpui(pa/nu) khanin police call lovin mahni a insawirem a tum maithei. A thusawi ngaihsak lovin, police call a tha ber. Accident tenau pawh nise. A chhan chu:

• I awmna State dan a zirin, police call kher kher a ngai maithei.
  A tlangpui State danah chuan inhliam an awm emaw, traffic kal lai a dang emaw, motor senso tur a to viau dawn a nih chauhin police call kher a ngai. Amaherawhchu mahni rin thu ngawta dah lohvin, I chiang lo a nih chuan call a tha ber. A lo ngaih tak si chuan chawi belh tur (fine) a awm thei. Call phawt a, chinchang hriattir hnuah, phone atangin police a ngaih leh ngaih loh thu an lo hrilh ang che. A ngaih loh chuanin accident report file turin thu an hrilh tlangpui, police station a nih loh pawhin online ah.

• A thiamlo zawk rel fel naah police report in a tanpui ang che.
  Motor insurance in tu thiamloh zawk nge tih thuthluk an siam hunah a tanpui tur che in official police report hi rin tlak ber pakhat a ni. Police report tel lo chuanin, tawngka a inhnial, ama thiamloh ama tihsual thu ah a tla tawh thin. An su che a, an thiamloh a nih ngat chuan, police report I duh ngei ngei. Nakinah inchhir leh hnuhnawhin awmzia a nei tawh l’awng. Police report awm loh a thil thleng thei chu, accident laiin ka thiamloh ani an tia, an insurance hnenah I va report, an lo hnial/phat leh si chuan, engtin nge I tih tak ang? Police report nen chuanin heihi a thleng lo vang. Accident a I thiamloh a nih pawhin, police call a that tho theihna chhan chu I thiamloh vek a lo ni lo thei. Loh theih loh vanga su I ni thei. A za vaia mawh nih I duhlo a, I insurance a kai vak I duh loh chuanin official police report neih a tha. Police an lo kal lo a nih pawhin, a hma thei ang berin mahni in report ang che. I lam thu chanchin (record) ah I nei dawn a ni. Insurance claim hunah a tanpui thei che.

• Police report in inbumna atangin a veng thei. Mi thenkhat hun rei tak a liam hnua rilru thlak leh atangin a veng ang che. I insurance atanga pawisa la duh ho, dawt a insurance false claim thehluh lak ata a veng bawk ang che. Heihi mi tamtak vanduaina leh buaina thlentu a ni. Kum tel hnua false claim thehluh chauh sawitur pawh a awm nual.

Accident hmuna police lo awm ve hrim hrim pawh hian rilru phawklek a tidam.

A thupui ah chuanin police call a him ber.

Police rawn tanpui in a kalsan hma chein a hming leh badge number dil ang che.

4. Lehlam driver nena information (chanchin) inthleng tur:

• Name (Hming)
• Address
• Phone number
• Email
• Driver’s License number
• Insurance company
• Insurance policy number

Social Security Number inpek loh tur. Claim/report turin mamawh a ni lo.

Chhinchhiahna tur lehkhabu leh pen motorah dah lawk a tha. Phone atang pawhin note lak theihna a tam mai. Tunlaiah phei chuan insurance company hovin phone app tangkai tak tak an nei nual tawh.

Information inthleng hi a diklo lo pe tawk an awm nual avangin amah ringawt chu inngahna tlak a ni lo.

5. Motor accident chungchang ziak thla rawh

Lehlam driver nen information in inthleng zawhah, hengte hi ziak thla ang che:

• A hun (dar zat)
• A hmun (location)
• Lehlam driver motor information, a make (Honda, Toyota, etc), model, kum, rawng, license plate number, leh a motor chhe lai hmuh theih.
• Accident a tel ho zawng, driver bakah passenger te nen.

Accident hlima tlanchhe thut an awm takin an motor license plate number, make, leh model number hi chinchhiah hmasak a tha.

6. Thlalak la teuh rawh

Thlalak a tam poh leh a tha ting. Thlalak te hi accident claim/report hunah accident awmdan tifiahtu leh thuhriltu an ni. A theih chuan driver hmel thlalak pawh lo neih ve re re a tha.

Thlalak turte:

• A accident zavai hmuh theih turin a hla atangin.
• A hnai atangin a chhe lai zawng zawng.
• Kalkawngah motor ke thla (skid marks) hmuhtur a awm a nih chuan lak bawk tur.
• I thiamloh ni a I hriat chuan, I motor sut kha a hnung, a hma, leh a sir atangin thla la kim ang che. Tikhan, lehlam driver in insut hmaa a motor chhe sa tichhia-ah a puh che a nih pawhin, thlalak hmangin dawt tih I finfiah thei ang.

7. Accident lo thlirtu information la rawh

Mita lo thlirtu an awm chuanin, an hming, address, leh phone number lak tum rawh. A thiamzawk leh thiamlo zawk inkar danglamna an ni thei.

 8. I insurance company hriattir rawh

Tu thiamloh pawh ni se, a hma thei ang berin I insurance company hnenah accident thu report ang che. I thiamloh a nih chuanin, I insurance policy ah khan report turin inziak a awm ngei ang. I accident thu leh I thawnthu lehlam driver in a rawn report hmain I lo hrilh hman dawn a ni.

Lehlam driver thiamloh a ni thung chuan, duhthlan theihna I nei. I duh chuanin nangmahin lehlam insurance I va phone thei. Mahse, chu ai chuan mahni insurance in buaipui se a tha zawk tlangpui. A tlem thei ang ber pawisa I dawn theih nan lehlamin theih tawp an chhuah dawn a, I insurance in lo sual ve se a tha zawk.

I Insurance I phone hunah I information pe la, engtik ah nge, khawiah nge accident a thlen, lehlam driver insurance information nen. Lehlamin insurance an nei lo a nih chuan a hming leh address pe rawh. Tichuan police report file a ni tawh tih leh thlalak I nei tih hriattir ang che.

Chumi hnuah chuan I motor chhia endik tur leh a hlutna hisap turin I insurance in mi an rawn tir ang.  Lehlam insurance pawhin chungtiang bawkin. Chumi hnuah insurance pahnihin pawisa dawn tur zat an ti fel ang.

Insurance hriattir hnuah chuanin engvak tih ngai a awm tawh lo. I motor siamna tur dawrah dah turin an hrilh che anga. I motor an siam chhunga khalh tur I mamawh a nih chuan insurance in an tumsak ang che.

~

Khaikhawmna:  Accident hi a hlauhthawn awm a, I hun a lo thleng hlauh chuan mangang chiai lovin rilru fim takin awm tum ang che. Manganna in a sawtpui tawh lo. A kalhmang tlangpui I hre tawh a, engmah hre lova hawi du du ai chuan rilru pawh a thlamuang sawt ang chu. Mahni himna tluk a pawimawh a awm lo tih hriat thar leh a tha. Accident tenau leh lutuk, a ho tham emai hei chu engmah tih a ngai lo I ti a nih chuan I thu (an report lo fo reng bawk a). A kalhmang I hriat hian nangma tan chauh ni lo, I hmelhriat te pawhin an lo hre lo a nih chuan I khawhhmuh ve chhawng thei dawn a ni.