Lunglen April 2013
Kim Kimi (Blue Corn) kawmna
Thulakna: Lunglen Magazine April, 2013
posted @ Sakeibaknei
Q: I zai lai hmel kan hmu tawh lova?
Nia, ka vocal chord-in min peih loh san a, kum 2011-a min zai (operate) atang khan mipui hmaah ka la zai leh ta lo hrim hrim. Min zai fuh lo ani mai thei, tum hnih lai min zai nghe nghe a. Hla pakhat sak chhuah pawh a harsa talh tawh a tunah chuan. Hman ang kha chuan ka fit tawh lo khawp mai.
Q: Blue Corn music video thar?
Felicia lo haw laia kan tih ho kha a ni a, thla hmasa khan local cable-ah an dah chauh a. A video kha chu hmanni lawka shooting kan nei ve kha a ni a. A zai hi chu min zai hma daiha recording kan tih kha a ni. He music video bak hi chu Blue Corn anga a hnuhnung ber tur a nih kan ring tawh a. Tun bak hi chu a beiseiawm tawh loh. Hnathawhna avangin hmun hrang hrangah kan awm darh bakah kei hi ka lo ‘fit’ tawh lo bawk nen.
Q: Designing lam daih?
Fashion designing lam hi music dawta ka tuina a ni a. Zai lam ka chawlhsan takah chuan fashion lamah tih takzeta ti turin Computerised Embroidery Institution of Fashion Technology-ah ka zir zo ve chiah a ni.
Q: Fashion designer?
Tunhnaia rawn tui thar thut pawh ka ni lem lo a nia. Blue Corn kan din hma daih atang tawh pawhin hetiang lam hi ka ngaihven tan daih tawh a, ka zai hma leh zai lai atang tawh khan ka hak turte hi ka design ve nasa thei lutuk a. Ka tuina lam anih avangin hun remchang hmasa berah ka bawhzui ta a ni ber.
Q: Engnge designer leh singer?
Ni e, artist ve ve an nia, an danglamna pawh sawi thiam a har ka ti. Mahse, mit leh beng kan ti tlai ve ve a. Singer pawh a performance a zirin mit pawh a ti tlai nasa a, beng bakah. Chutiang bawkin designer chuan a thil design te chu nalh a ti em em a, a mit pawh a la hle. Designer chuan mit kan tih tlai bakah kan nitin mamawh thawmhnaw kan siam a, an pawimawh ve ve a ni mai.
Q: Theme deuh bik i nei em?
Tun tum Fashion Fusion-ah kha chuan ka theme hming chu ‘Titanium’ a ni a. Titanium hi metal-ah a chak hle a, meialh leh tuite paw’n an ti chhe zo meuh lo. Chutiang ang chu ka ni a, ka chak a ni tih ka lantirna a ni. Structure leh Futuristic-in ka kal a. A hun mil ang zel hian ‘theme’ chu ka kal, duh bik ka nei chuang lo. Thil ni beihbuaih ai chuan simple fel deuh ka ngaina.
Q: I kutchhuak te hi?
Tunah chuan dawr ka la hawng lo a, keima hnenah hi chuan lei leh hawh theih ka kawl. Hun leh hmun remchang te Pathianin min siamsak thei a nih chuan, mahni puala dawr siam hun te pawh ka la neiin ka ring.
Thulakna: Lunglen Magazine April, 2013 posted @ Sakeibaknei
Band: Blue Corn