Phir Unau [Thawnthu Mak]

Hrang ZahawmaThawnthuLeave a Comment

unau phir thawnthu

Phir Unau thawnthuPahnih ni tur kan ni lo reng reng a. Pakhat chiah ni tur kan ni.

“Phir ka hua” tiin ka nu in kum 4 ka nihin ka hnenah a sawi a, kalkawngah unau phir inang kal a hmuh hnuin. Mi hrilh lai chuan kawng sir kawmah kan awm a, ka kut vuana a tlan thut avangin ka khup chu ka hrut a, ka tah lai tak a ni. Ka bulah chuan khawng takin a ding a, thutna hmun a awm loh avang chauhin naute angin a mu kawm lo chauh a ni. A bul kawrah kan “him” ta tihah chuan a luak bawrh a.

Ka nu hian phir hi a haw tak tak. A chhan pawh ka hre duh lo. Ka naupan laiin ka zawt thin a tunah erawh chuan ka hre duh tawh hauh lo. Enge a chungah thleng a, enge a thisen chawk phurtu, a enga pawh chu lo nise a nun, leh kan nun thlenga khawih danglam vek turin a thawk chak tawk.

Chu chu ka kai ve ang tih ka hlau – keimah ka lo ni zawk ang tih ka hlau. Kei leh ka unau nu chungchangin khati khawpa kan nu tihthaih thei kha.

Zan khat chetsual vanga piang kan ni a – tleirawl kan nih laiin ka nuin min hrilh a, khami zan kha chu ka rui lutuk a kha pa phone no. pawh ka lak hma hauh a ni a ti. Pawngsual chu a ni lo a ti thung.

Biak leh tumna a nei lo reng reng bawk a, amaha nau enkawl chu a nghakhlel zawk a. Ka nuin a naupan lai a sawi ngai lova kan pi leh pute pawh kan hmu ngai lo. A hmang tha lutuk lo a nih ka ring. Tunah nu tha tak ni theihna hun remchang a nei hi a lawm niin ka hria. Damdawiina inentir lawknaah hmeichhia tih a hriatin room awl pakhat chu pink rawng tak deuhin a chei nghal a, pangpar leh lasi lem te nen, naute kawr pink leh purple rawng pawh a lei teuh a. A fa pakhatna tur a nih avangin eng tiat nge lei tur pawh a hre lo.

Kan la te, a thla sarihnaah doctor chuan inentir scan a ngai leh a ti a – min chhiat turin a tlai tawh. Engtin nge khami kar zawng zawng khan a tawrh theih zawk ka hre lo, min enkawl chhunzawm chhan pawh ka hre lo. Ka rin theih chhun a chu, kan pian hnuin fahrah enkawlnaa min dah chu a tuar ngam loh vang a ni ang. Fa pakhat chiah a duh anga pakhat chiah kawl chu an phal dawn lo tih a hriat vang pawh a ni ang nge.

Ka hre lo, ka hre chang tawh lo. Ka hriat chhun a chu kan pian hnu reiloteah (kan pian hma pawh a ni thei, phir kan nih tur thu a hriat lawk avangin) phir ni mah ila mi pakhat anga min enkawl turin a rel fel a.

Birth certificate pawh pakhat chiah a awm a, ‘Annabelle Bailey’ tiin. A changin Annabelle ka ni a, ni dangah ka unau nu chu Annabelle a ni ve thung a.

Rin aiin a thawk tha. Zan tin mut hmain step hnuaia almira-ah, phir hming nei lo zawk tawm bonaah chuan kan inhmu a, tumahin an hriat hran theih loh turin enge vawiina thil thlenga thil awmdan kan inhriattir thin a.

Kan ni sawifiah dan kan thiam phah zek a, tun thleng hian ka unau nu chunga thleng, mahse nimin lawka ka chunga thleng anga hriatte pawh ka la nei. Kan thiam a ngai ve reng bawk a, school kan tan tirhin zirtirtute’n hmeichhe naupang thiam thei, mahse a tuka theihnghilh lehnghal lakah dawhtheihna an nei duh vak lo. Thenkhatin kan a der angah an ngai a, thenkhatin kan rilru a chiang vak lovah – engpawh nise, kan thil hmaihte inzirtir kan thiam chho hle.

Ka nuin hetianga nung tura min hrilh lai ka hre lo, mahse thawkkhat lai chuan a sawi ngei a ni ang. Step hnuia almira kha a pawnah tala a kalh a ni a, mahse duh chuan kan chhuak thei tho ang. Chhuah kan tum lohna chhan kha ka hre lo.

Chutiang thil ang kan tum ve deuh reuh awm chhun chu kum 8 kan nih laiin maths ah mark sang ber kan hmuh avangin pizza restaurant-ah hruai chhuah min tiam a.

Maths exam chhangtu ka ni a, mahse ka unau nu chuan a hlep daih dawn a. Ni engemaw chen chu a nih dan tur a ni loh zia ka ngaihtuah reng a, restaurant kan kal hma ni chuan inthleng loh zai ka rel ta a. Almira kal pel hmakin khumah ka chho tlang a, ka unau nu chu ka chungah enge thleng ta tia suangtuahin ka kalsan a.

Khami ni kha ka hmang nuam lo. Ka unau almira kalhkhuma ka kalsan vang chauh pawh ni lovin, restauranta pizza ka ei lai chuan thil ka hrechhuak a, zunna tur bucket pakhat (nakina ka tihruah tur) leh ei tur tlem azawng chu kan dah thin a, plastic bottle a in tur nen. Tunah chuan a zo vek tawh ang tih ka hrechhuak a, bucket phei kha chu ka ngaihtuah ngam lo.

Ka thin ti rimtu ber erawh chu tumahin min man chhuak lo kha a ni. Kan zirtirtu tumahin danglamna an hre lova, ka thiante pakhat mahin an hre lova, ka nu ngei pawhin a hre hauh lo. Tunah ka thlir let leh hian pizza vang kha a ni a ngem? Nge ni miin ka unanu aia danglam anga min hmuh ka beisei zawk. Keimah inhriat ka duh vang pawh ni theiin ka hria.

Khami zan khan kan inthleng leh a, khatiang ang kha vawikhat mah kan ching leh tawh lo.

Thil pakhat ka sawi duh chu, pizza restaurant a kal zawk ni ngeia ka inhriat laiin ka unanu nu zawk pawh a ni thei tho. Restaurant a thuin pizza ka ei lai leh ka inthiam lo lai chiang takin ka hre thei – mahse mal tak leh mangang taka almira chhunga ka unaunu ka nghak lai, min theihnghilh ta em ni tia hriatna pawh chiang takin ka nei.

A chang chuan phir nih hi a har ve thin.

Kan puitlin, in kan chhuahsan hnuin mi pangngai anga awm kan tum a, mahse a tlai tawh lutuk. Hemi chiah hi nun dan kan thiam a, kan inthlak thei tawh lo, kan tihdan ngai bawkah chuan kan let leh ta a. Kan in thar luahnaa kan luh tirhin hun bi kan ruat lawk a, pakhat a va luh laiin darkar hnih hnuah pakhat zawk kan va lut ve leh a, tichuan pakhat pawn a chhuak zawk angin a lang. Amira hlui anga lian a awm loh avangin thawmhnaw dahna wardrobe kan hmang a, mahse kan nu kha bus-in a su a, a in hlui kha a fanu ‘Annabelle’ kutah a dah tih kan hriatin kan insawn lut leh a. Almira hlui kha kan hmang leh ta a.

Tunah hian he thu hi ka ziah chhan I ngaihtuah maithei.

Kar khat pawh a la liam lo tihah khan kan inchung sang bera pindan (attic) ka fang chhin a, thla tlemte chauh kan la awm a kan enfiah ngai lo hrim hrim. Kan naupan lai pawhin kan nuin a chhuat a him lo a tih avangin ani lo chu han chho an awm ngai lo.

Ka han chhoh chuan ka fimkhur hle a, ka tla ang tih ka hlauin chhuatah chuan ka bawkvak phei a. Chutih rualin ransa thi rim a nam avangin thian faitu koh a ngai tiin ka ngaihtuah bawk – chutah bangah chuan kawngkhar ka hmu a.

Ka hawng a, pawn atang a inkalh tih pawh ngaihtuah mang lo chuan a phenah taksa a awm tih ka hmuhin ka te tuar a. Hmeichhia a ni tih a pawnfen atang chuan ka hre thei, chiang takin a awmna a rei tawh tih a hriat theih (ransa thi rim kha hemi vang tih ka hriatin ka luak lo chauh). A sam buang, ka sam ang, ka hmuh hnu chauhin ka nu a ni tih ka hre thei a.

A hnu deuhah ka nu a ni thei lo tih ka ngaihtuah chhuak a – ka nu ruang chu kan veng thlan mualah an phum a, a kuang pawh an dah thlak lai ngei ka hmu si a, mitthi dahna hmunah pawh ka awm ve ngei – a ke bula plastic bottle ruak chu ka hmu a. Ei tur bawm ruak ka hmu leh a. Chutah (hetah hi chuan minute nga zet ka taksaa awm zawng ka luak chhuak vek) bucket khat vek kha.

Helam kawngkharah hian kut tin hniak a lang nuaih a. Hmun hran hrana a kut thla zawng pawh (a kut lawngin a chum a nih ka ring, a kut chang a thi phung danah). A awmna a sang em avangin tumahin a awral an hre thei dawn lo tih a hria a ni ang.

Kei chauh phir unau thuruk nei ka lo ni lo a ang.

Letlingtu: Hrang Zahawma

Note: I post chhawng dawn a nih chuan All Mizo credit I pe hram dawn nia. 

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Leave a Reply

Your email address will not be published. Required fields are marked *