Thlahrang Palian [Thawnthu]

Hrang ZahawmaThawnthu1 Comment

Thlahrang Palian

Thlahrang PalianKa nunhlui chanchin kan hrilh teh ang che u,

Hmanah chuan middle class khua hausa vak lo vengah kan awm a, kum 1960 chho vel kha a ni daih tawh nghe nghe. Kan chhungkua chu chhungkaw pangngai ve tak hna thawk nasa kan ni a, ka nu hi nu maksak ve tak, thlarau be thei kan tihte zinga mi a ni. Kan chhungkua chuan kan la urhsun em em a, dawhkan ben rik atanga thlarau a biak chang hian kan chhungkua chu kan thukhawm thap zel a ni.

Ka nu chuan dawhkan khawng rik atang ringawta thlarau biak chu duh tawk lovin lehkha a ziaka biak dan a zir chhunzawm a. Tum tam tak chu tawng kan hriat ngai loh hian a ziak fo mai a, lehlin te pawh a ngai hial a ni. Ka nu tawng thiam leh hriat thiam chhun chu English a ni a, English chauh a nih avangin harsatna pawh kan tawk hnem hle. Ka naupan lai hian hetiang thil mak tih naah hian ka tel tam hle a, chung hun laite ka ngaihtuah let chang chuan ka la hriatreng chu kan dawhkan chawi kanga room banga thlaruavin a vawmchawrh te a ni a, thlarau hian thil an lo ti thei khawp mai.

Ka sawi tawh ang khan kan naupan lai atanga kan thil tawn avangin ka thiante zingah pawh ka danglam em em a, chu kan chhungkaw thil tawn chuan min ta neihin ka bansan thei lo reng reng a, heti hian ka ngaihtuah fo reng a ni. Ka thiante hrilh ta ila an awih dawn chuang lova, chubakah, kan chhungkua min hmu mak vek dawnin ka hria a tun thleng hian ka zep a, kum sawmli (40) ka tlin tak hnuah hian ka sawi chhuak ve ta chauh a ni.

Kum nga emaw kum ruk vel chauh ka nih laiin zan laiah tih harhin ka awm fo a, khang hunlai khan thlahrang anni tih ka hrethiam lova, an var vek a, an langtlang thei bawk. Ka puitlin hnua ka ngaihtuah let hian ka hmuh thinte kha thlahrang an ni ngeiin ka hria. Ka khum bulah an rawn leng phei delh delh a, min titi pui an duh thute an sawi fo thin. Ka hlau lutuk ka au hma hian au lo turin min hrilh fo bawk a. An thil min hrilh tum pawh ngaithla lovin ka au chhuak leh nge nge thin a, zan tam tak ka chungah hetiang thil hi a thleng fo a ni. Ka au thawm avang chuan ka pa a rawn tlan lut a, ka room a mihring an awm thute ka hrilh hnuin ka nu bula mu turin min ti a, a ni ka room-ah a mu thung thin a ni.

Ka nu hnen atanga ka hriat dan chuan kum nga vel i nih lai khan i room-ah hian titi pui i nei thin a ti a, chung thlahrang ho ka titi pui lai reng reng ka hrechhuak zo lo a ni. Ka nu hian i roomah hian ka lut hreh thin a ti tel bawk a, a sawi dan chuan energy (chakna) i room in a ngah thin em vang a ni a ti, ka naupan laia hlim taka ka mutna hmun chu a hrang ka ti lo thei lo.

Kan inah chuan thingrem zaithei kan nei a, tun thleng hian ka nu chuan a la nei nghe nghe a. Chu thingrem zaithei chu ka nu pi ta a ni a, zan laiah hian tuma khawih loh hian a rawn zai thin a, chutiang thawm chu kan hriat ngun em avangin eng vakah kan ngai ngai lo a ni. Kan upa ve tana kan inah pawh kan thiante an rawn riah ve hnu chuan zanlaiah chutiang ang chuan a rawn awm a, ka thiante chuan an hlau em em a, kei chuan ka nuihpui mai mai thung. Kan in a thlahrang te hi kan chhungkuaah an bet vek tawh ni berin a lang, tuman min ti na ngai lova keini pawn kan ngai thutak lem chuang lo a ni.

Mahse zan khat chu a vawrtawp a thleng ta a ni ber mai, kan tih dan pangngaiin ka nu bulah ka mu a, ka pa chu ka room-ah a mu a. Tui taka ka mu min ti harhtu chu ka nu hlau au thawm a ni a, thil ka hre tlem hle. Ka hriat chhun chu ka nu leh ka pa au thawm a ni a, “Ngatinge” tiin ka pa chu a au vak vak a, kan inchhung hallway ah chuan kan tlan khawm ta a ni.

Ka nu chuan ramhuai palian pui lukhum parh khum zuang tawn zek zek chu a hmu a, ka va hmu ve mai a. Mahse ka pa erawh chuan a hmu ve lo, a awmna chin chu a dum huam mai a, kan inchhungah chuan a petek kual a ni ber mai. Ka nu hlau chu a au tuar tuar a, ka pa chuan a hmuh ve loh avangin ka nu chu “Ngatinge,” tiin a lo au khum ve reng bawk a. Chutia kan buai em em lai chuan ramhuai chu kan bedroom bang lam a pan a, kan bedroom bangah chuan kal tlangin kan hmu zui leh ta lo a ni.

Chu zan hahthlak tak kan sutkian hnu chuan ka nu chuan ramhuai biak a tumna te leh a tuinate chu thawkleh khata lak bo sak ang mai hi a ni a, tun thleng hian biak a tum leh ta lo.

Ka nutei (Rita-i) inah hun reilote kan cheng zui a, kan hlauhna te a reh tak hnu chuan kan in lamah kan haw leh a. Zankhat chu thil mak tak mai ka tawng a, tlai tawh takah in ka thleng a, ka mutna lam ka pan nghal a. Ka room ka luh fel hnu chuan ka room kawngka chu a inkalh a, mak ka tiin hawn ka tum nasa em em a, minute sawmthum (30) chuang ka room kawngka hawn tum chuan ka bei a, ka hlawhchham chiang kher mai.

Ka room atang chuan room lehlam a lut turin tukverh a chhuah ka tum a, tukverh ka hawn chuan ramhuai rawn lawn ka hmu a, a bo leh nghal mai a. Thli vawt takin ka room chhung atang chuan min rawn chhem a, a rei lo, a vawt hle thung. Ka inti pakhauh lui a, room lehlam tukverhah chuan ka lut ta mai a, ka room kawngka kan en chu a lo inhawng leh reng lawi si! Inchhung chu ka enkual vek a, tumah an awm si lo. Miin min tihthaih an tum nia ka rin chu a ni lo chiang khawp mai.

Heng thlahrang te hian thil min hrilh duh an neih laiin ka hlau a, ka au chhuak fo reng a. Tun thleng hian ka inthiam thei lo, min hrilh duh kha min hrilh ta se kan chungah hian engmah an tih ka ring lo reng reng a ni. Kan in kan chhuahsan hnuah erawh chuan thawm kan hre ngai ta lova, kan in luahtu te erawh chuan buaina thar an neih thu kan hre fo a ni.

Translated by
Solomon L Sailo
[email protected]

Thulakna: Diktawn 2012, March (Vau Thla)

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Comments 1

Leave a Reply

Your email address will not be published. Required fields are marked *