Midang tanpui hi mahni hlawhtlinna bulpui a ni.

Midang tanpui hi ngaihdan pangaiah chuan kut hnathawha mi tanpui, pawisa hmanga mi tanpui, mi thil leisak tura ngaihna a awm. Mi tanpui tak tak tur chuan midang dah hmasaka mahni indah hnuhnung phawt a ngai tih ngaihdan a awm bawk.

Midang dah hmasa lova mahni indah hmasa thinte hi mahni hmasial lutukah kan ngai a. Mahse a dik takah chuan mahni indah hmasak phawt loh chuan midang kan puih theihna te hi tlemte chauh a ni thin.

Kan nihna zawng zawng, kan tangkai theih tawpa mi tanpui tur chuan mahni kan indah hmasaka kan intanpui phawt a ngai.

Chutiang ang thusawi chu I hre ngai lo maithei. “Midang tanpui hmasa lovin mahni in tanpui hmasa phawt rawh”. I hre vak lovang. Thudik ni mahse vantlang ngaihdan nen a inmil lo.

Mahni indah hmasak avangin inthiamlo suh

Kan khawtlang inzirtir dan a nih loh avangin mahni inthiamlohna te pawh a awm thin. A dik ve na lai pawh a awm. Khawtlangah mitinin a rualin mahni indah hmasa vek se chuan inlungrualna leh inkungkaihna a awm thei dawn lo. A huhova awm za tur chuan kan inpuihtawn chu a ngai. Chutih rualin piantirh ata inzirtirna leh inzilhna avanga midang dah pawimawh lutuka mahni inenkawl na chang hre miah lo an awm bawk. Midang ngawr ngawr dah hmasak chu mahni hlim lohna thlentu, mihring puitlinna dodaltu leh I themthiamna zirna sang ber tichatlak tu mai a ni.

Mahni hmasial hi a thatna lai tamtak a awm.

Mi tlaktlai lo leh thiam nei lo I nih chuan, mahni hmasial turin ka fuih a che. I nun I enfiah a, kawng engemaw laia I hlim lo viau a nih chuan mahni hmasial turin ka fuih a che. Midang dah hmasa tawh suh, I inzirna leh hmasawnna dah hmasa ber rawh. A nih loh chuan I kum a lo upa anga hmasawn miah lovin kum tin a ral zel ang. Kum tin mai hmasawn lova a ngai reng I nih chuan kha kum kha I hmang thlawn.

Mahni Intanpui Hmasak Hlawkna

Midang dah hmasa reng thin ka ni a. Ka hlimna aiin midangin nuam an tih loh hlau reng rengin ka ngaihtuah buai thin.

Midang ringawt ngaihtuahin, an ngaihdan ho tak la thutak em em chung si leh an sawichhiat hlau bawk siin ka awm thin. Ka chhungril a ka hlim loh phah em avangin inthlak duhna thinlung ka nei a. Keimah indah hmasak a ngai a ni tiin hun enge maw chen chu mahni hmasial deuhvin hun ka hmang a. A tirah chuan ka tih ngai loh em avangin mahni indemna te pawh a awm. Rilru leh tihtakzeta bei ka nih thung avangin hma pawh ka sawn chak hle – chhungte pawhin “mahni hmasial” tiin min ko fo. Ni rawh se. A ngai a ni tiin ka thlahthlam chuang lo. Mihring kan puitlinna kawng zelah hun engemaw chen hi chu kan indah hmasak ber a ngai. Tunah chuan ka beih luih avang leh thulh miah lova ka tihtur ka hlen avangin inchhirna pakhatmah ka nei lo.

Ka thiltih thenkhatte (kum 1 chuang chhung – a then chu tun thlengin):

1. Ka taksa ah ka hlim lo – thulh miah lovin kar 1 ah gym ni 3-4 ngei ngeiin ka kal.
2. Ka zakzum lutuk – hlau chung chungin mi ka be lui.
3. Ka inluahpuite chaw ei ang ka ei lo – harsa viau mahse taksa tha leh hrisel (gym nen) ka duh avangin chaw hrisel lo ka ei thinte ka bansan.
4. Zan hma tawka mut leh zing hma taka tho – zana thian kawm thinte ka hmu lo rei thei hle.
5. Facebook leh social media chhuahsan – hun leh rilru la pengtu an nih avangin ka deactivate hlawm kum 1 chuang.
6. Mi dilna apiang “Aw” tihzel tawh loh – hman lo leh buai tak chunga ka lo Aw zel thin avangin Aih tihdan ka zir thar (Rin aiin a awlsam lo).

Hengte hi ka hmalak zinga kawng thenkhatte an ni a. Beihpui ka beih lai chuan ka thlahthlam ngai lo. Chumi khami chu kal ang an tih pawhin ka thulh phah emaw ka lo ruahman lawk nen a inkalh chuan ka theilo ka ti zel. Hun rei tak chhung chu.

Mi thenkhatin an ngai thei lo. Mahse keimahin ka mamawh em avangin ka tilui a. A harsa ah pawh bansan mai lovin.

A rah chhuak chu mahni kan inenkawl that hian midang kan pui let ve leh thei thung. All Mizo pawh hi midang tanpuina website a ni a. Tunah hian kum 1 a chuang tawh a Rs/$ 1 pawh ka la hmu chhuak lo. Mahni hmasialna atanga tan ni mahse a bulpui berah chuan midangin an lo tangkai pui theih tura website a ni.

Khaikhawmna 

Midang tanpui hi hlawlhtlinna a ni. Sumdawnna hlawhtling en la – mi mamawh emaw an duh I pek theih chuan I hlawhtling viau ang. Midang nun tizangkhaitu, tinuam tu leh an harsatna sut kiang sak thei sumdawnna chu an hlawhtling hle thin.

Midang tanpui dan tha deuh mai chu an buaina leh harsatna tihkhiang dan kawng hmuhtir.

Mihringte hi kawng tamtakah inan tlanna kan neih theuh. Mi pakhat harsatna chu mitinin nei lo mahse mi tamtakin kha buaina tho kha an nei ve. Chuvangin mi pakhat chauh pawhin chu a harsatna a sutkiang dan kawng a tawmpui chu midangin an lo hman tangkai pui ve zel thei. I hlim lohna lai buaipuia nangmah chauh I intanpui emaw I tih kha mi tamtak tan chuan malsawmna a lo ni daih thei.

Midang nun buaipui lovin mahni inen hmasak a pawimawh. Midang chuan engpawh lo ti rawh se. Nangma tlin lohna en a, I hmasawn zel theihna tur kawng harsa zawh a pawimawh zawk. I tih tur chu thulh lovin, midangin an lo koh pawha hnar chang a awm a ngai. Mahni indah hmasak hi nangmah leh midang nun thlak danglamtu a ni thei.