Tlangval Nula Rim Dan [Hman Lai Mizo Khawsak Dan]

Hrang ZahawmaZirnaLeave a Comment

tlangval nula rim dan

Lehkhabu: Hman Lai Mizo Khawsak Dan leh Mizo Buai Lai Thu
Ziaktu: Padma Shri Rev. Dr. H.S. Luaia

tlangval nula rim dan

Tlangval nula rim dan

Kei chu ka tlangval ve chinah kan Kohran Upaten nula rim an khap tlat avangin nula ka rim ve lova. Ka nupui ngei pawh vawi khat mah rim lova ka neih a ni a, mahse a lo tha phian a.

Hman lai chuan Val Upate hian Zawlbukah thu an nei em em mai a, Zanriah ei khamah Zawlbukah an han chhuak khawm a, pumpual (bawhbel)-ah an bawk tlar a, an han zai a, Val upaten len hun an tihah chuan, “Khai le, nulain hmui an hung tawh ang, I leng tawh ang le,” an ti a. Nulaten hmun an phiah fai a, engkim an han tih fel hun, vawk chaw tur te an han chhuan zawh a, an hmui kaih tur an han hun fel chuan tlangval chu an duhna lam lamah an leng ta sang sang thin a.

Tlangvalte hian khumpui pelin in chhung lamah thuthmun an rem ngai lo, nu leh pa hi an zah em em thin a ni. Thenkhat phei chu vawk chaw bel bul kawngka bula thute pawh an awm thin a ni. Nulain mei vil pahin la a kai a, tlangvalho chuan a khat tawkin an vaibel zuk meiling an laktir a. A velan an thu khap thin a.

Nula bulah hian zahmawh sawia pawt mai mai an ching lo. Chutiang ching chu nulate pawhin min zah lo, tiin an lawm bik lo a ni. Amaherawhchu nula fing chuan an ngaihzawng pawh awm mah sela an tilang duh hauh lova, min ngaizawng vek emaw tia ngaihtha turin an fimkhur ve em em thin a ni.

Tin, an kal lama Val Upaten thu an nei ang bawkin nula an va rimnaa an khawsak danah pawh an fimkhur ve a, nulain la a sai dawn chuan a inleng tlangvalten an saisak thin a. Amaherawhchu sai thum aia tam chu an sai tur a ni lo, sai thum aia tam an sai chuan Zawlbukah tlangvalten an han sawi a, Val Upate chuan an puan chu a laiah an hrawm khawm a, sum khatah an hlep hmawk mai a, sin leh tlak a ni tawh lo. Chutianga an tih chuan nulain chu tlangval chu puan thar a pe ve ngei tur a ni.

Lenglen hun an tihah thu an nei ang bawkin len rei lutuk pawh phal a ni lo. Hman lai chuan ar hi a khuang zing hle a ni ang. Leng hnar ar a khuan tawh chuan hawn ngei ngei tur a ni. Nulate hi nilenga lo lamah feh hah an ni a, an len rei chuan an mut te a lo chhuak thin a. Chuvangin rei lutuk chu an lenchilh tur a ni lo.

Favang (Fawvang) lai chuan Favang awllen an ti a, nulain sumhmunah puan an tah a, chu chu tlangvalin an rim thin a. Chutah pawh chuan tlangval ninhlei deuhvin nula hnute deh tum emaw, an tana hnawksak deuhva awm ching emaw tlangval chu an dim bik thin lo. Tlangval nungchang tha hi nulate pawhin an hre ve em em thin a ni. Lo thlawh laia tlangval thatchhia ina awm chingte chu pasalah an duh bik thin lo a ni. “Ani ka neihin eng nge ka ei ang” an ti thin a ni. .

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Leave a Reply

Your email address will not be published. Required fields are marked *