Thi Turte Inchhirna Lian Ber 5

Hrang ZahawmaNunna1 Comment

Tuipui Thi Turte Inchhirna

Thihna pumpelh tur kan awm lo. He khawvela kan hun tawite hi inchhirna awm lova hman duh lo tunge awm?

Kum tam tak Palliative Care (damlo enkawlna) a thawk tawh nurse Bronnie Ware I chuan a damlo enkawlte hnen atanga an Inchhirna Lian Ber 5 a sawichhuak a. A damlo enkawlte hi thi tawh tura ruat lawkte an ni.

Tuipui Thi Turte Inchhirna

Thi Turte Inchhirna Lian Ber 5

#1) Mi beisei anga nung lovin ka duh anga nung turin huaisenna lo nei tawk ila.

Heihi inchhirna common ber a ni. An thih dawna an nun an thlir letin an duhthlante, an thiltihte, an tihlohte an hmu a. Anmahni duhzawng leh tum ni lovin midang beisei zawkin an nun an khawhral a. An duhzawng an hlawhtlin lohte leh umzui lohte’n an rilru a thawng nasa hle.

Mahni duh leh tum ni lova mi fak duh avanga nunna chu atna a ni. I la inchhir ang. Mi duhzawng anga nung lovin I thinlung chhunga I duh kha hlawhtlin tumin I hringnun hmang zawk rawh.

#2) Hna lo thawk tam lutuk lo ila ka chhungte tan hun ka nei tur.

Hna an thawh nasat lutuk avangin an fate tleirawl lai leh an kawppuite bulah hun an hmang hman lova. Hun a lo reiin an thatlai kumte a lo ral leh ta mai si. Hmeichhiate pawhin nei tho mahse mipate hi chhungkaw chawmtu ber an nih avangin he inchhirna hi mipa zingah a common hle.

Enge I nunah pawimawha enge tangkai lo tih I hriat a pawimawh. Thil tangkai lovin I nun a luahkhah chuan a aia pawimawh zawk tan hun I nei thei lovang.

#3) Ka thinglung chhunga ka vei kha lo sawichhuak ngam ila.

Mi tam takin midang nena an inrem zawk nan tiin an feeling tak an thup a. Hemi avangin a hnuah damlohna leh ngaih huatna thlengin a khawih leh chawk.

I thinlung chhunga I vei chu I ngaihsak loh chuan chhunglam atangin a ei ang che. Ngaihsak loh I tum pawha I rilru a dam theih loh chuan tidam turin hma I lak a ngai. A nuam dawn lo, a harsa ang. Amaherawhchu I thih dawna engmah I tih loh avanga inchhirna neih ai chuan a tha zawk tho. A ni lawm ni? Nangmahin I pawisa lo a nih loh chuan miin nawmnah takin an cheibawl tur che a ni lo.

#4) Ka thiante nen khan lo inpawh chhunzawm ila.

Thian hlui leh thian thate hlutzia an thih dawn hnaihah chiah an hrechhuak a, mahse chhuichhuak leh turin a tlai tawh fo thin. Mahni buai buain hun an hman ral hnuah thih hun a lo ni dawn der a, an thih dawnah an thiante an ngai theuh.

A tawpah sum leh paiin awmzia a neih tawh loh hunah hmangaihna leh midangte nena inlaichinna a pawimawh tawh zawk thin. Thian tha chu thian satliah 100 aiin a hlu zawk. Mahse thian thalo chuan a hruai sual ang che. Thian tha nei turin thian tha nih hmasak a pawimawh.

#5) Mahni hlimna hi duhthlan theih a ni.

Hei pawh hi a common khawp mai. A tawp dawn hnaiah chiah hlimna hi an duhthlan theih a ni tih an hrechhuak a. Thil awm dan pangai leh tih dan thin pangaiin an nun ro a rel a, inthlak hlauhna avangin a ngaiah an awm reng a. An hlim tawk tih midang hnenah tarlan duhin dawtin an nung a. Midang mai ni lovin mahni inbumna lian tak a ni. Thih thlengin an duhtak chu an umzui ta lo.

Midang ngaihdanah che I rilru tibuai lo la, I awmnaah I hlimlo a nih chuan thlak rawh. Midang ngaihdan I ngaimawh chuan thihna khuma I awm hunah I ngaimawh nguar ang. Hun I la neih laiin I duh chu um ngam rawh.


Inchhirna nei lova thih nge I duh awmze neih tawh loh huna inchhira khah?

I nun kha a hlu, I ta a ni. Hlim leh lawm taka I hman theih nan mahni intanpui hmasa la, midangte I tanpui veleh thei ang.

Midang hlimna tur ngawtin I nun khawhral suh.

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Comments 1

  1. Pingback: Film Changtupa Nih Dan - Zakzum Hmeltha

Leave a Reply

Your email address will not be published. Required fields are marked *