Kumthara Duh Duh Neih Dan

Hrang ZahawmaNunnaLeave a Comment

I Duh Neih Dan

Kumthara Duh Duh Neih DanKumthar Chibai. 2015 a zo leh der tawh mai.

Khatiang ang mai khan mikhap kar lovin 2016 pawh hi a ral leh mai dawn.

Mitinin New Year Resolution (Tun kuma hlen tur – a) cher b) zial zuk nghei, etc) kumtinin an siam. Kumtinin an hlen lo bawk. An han chhuiin 100 a 8 chiahin an resolution kumtluanin an hlen thin.

Kumthar a nih vangin rilru phur thar thut a awl, ‘Tun kum chu mithar ka ni dawn‘ tiin. Thuruk pakhat, thuruk lutuk ni si lo chu kum a thar avangin mithar I ni ngawt dawn lo. Mithar ni tur chuan thil pahnih I mamawh 1) Hun – Time 2) Mahni Inthununna – Discipline

Mahni inkhuahkhirhna (discipline) I neih chuan I duh duh I nei thei. New Year Resolution siam kher ngai lovin, kum thar nghak kher lovin, vawinni atang law lawin I tan thei. Mahse, ‘Vawiini chu ka peih thlawt lo’ tih a awm thei lo. Nitinin I beih a ngai. A nuamah pawh, a hrehawmah pawh.

He thufing hre lo hi an tam lutuk. Kawng awl apiang, a rei lo leh na lo thei ang ber zawngin hun pawimawh an khawhral a.

  • Thiamna leh hriatzauna I duh – ebook lehkhabu a thlawna chhiar sen loh a awm.
  • Lam thiam I duh – Youtube atanga zirna video a tam mai.
  • Thiamna tak tak tangkai bawk si Programming ang te thiam I duh – Online-ah course a thlawna lak tur a tam.
  • Cher I duh – Gym zawm rawh. Anih loh pawhin mahniin tlan la, pushups, situps, squats ti rawh.

I duh ber neih dan kawng a inang vek:

  1. A harsatin beidawng suh.
  2. Nitinin bei rawh.

Kumthara Duh Duh Neih Dan

Tehkhinna: Tunkum chu ka in la fit teh ang I ti a, gym-ah I kal. Kar 2 chhung chu kal turin I intur lui. Kar 3 naah I peih tawh ngang lo, tunkar chauh chu ka chawl mai teh ang I ti. Kar 1 chauh pawh I chawlh avangin gym kal leh I peih tawh lova, inrin loh laiin kum chu a lo ral chu a ni leh mai.

Mahni inthununna I neih chuan a kar 3 naah khan peih lo chung chungin I kal lui ang. I kal luih avangin I inchhir miah lovang. I tilui zel a, hun a lo ral zel chuan I thawhrah man I seng zel a, kum tawpah chuan I taksa ah danglamna nasa tak a lo thleng a, I rilru a khauh phah sawt a, I thutiam I hlen bawk (heihi a pawimawh).

Khaikhawmna

Kan duhzawng chu sawi a awl. Kan duhzawng neih chu a awl lo thung – Bungrua leh pawisa a lei theih thil ngawt ni lo.

Mi naran leh mi tumruh inthlauhna chu mi naranin a duh chiah a sawi a, umzui a tum lo. A umzui ve pawhin tlemte a harsat deuh hlekin a beidawng nghal thin. Mi tumruh erawh chuan a hlawhtlin hma rak a bei thin.

Chu thuchah chu a ni in hnena ka thlen duh chu, Ka duh ti mai tawh lo la, I duhzawng chu umzui rawh I neih hma thlengin, nitin bei zel rawh thih thleng pawhin.

Kawng awlsam a awm lo.

Share this Post

SAKEIBAKNEI list a tel ve turin a hnuaiah hian I email chhu lut rawh. Thil tha leh pawimawh apiang kan rawn email ang.

Post dang inang

Leave a Reply

Your email address will not be published. Required fields are marked *