Midang Neih Ang Neih Ve Kher A Tul Lo

Zakzum HmelthaNunna1 Comment

Midang Neih Ang Neih Ve Kher A Tul Lo

Note: He post hi mikhual (guest) post a ni a. A hmasa ber niin a ziaktu atang hian beiseina sang tak kan nei. A website Zakzum Hmeltha ah a hmuh theih e.
———————————————
Midang Neih Ang Neih Ve Kher A Tul Lo Naupang infiam I hmuh thin chuan kum naupang te, chhia leh tha hriatna pawh la nei lo rual an inkawmin midang ken lai kher toys an inchhuhsak thin. A then phei chu midang ken lai kher lo chu duhlo te pawh an awm.

Midang neih ang zel kan duhna rilru puthmang hi kan pianpui (genetics) a ni.

Ka naupang laiin sikulah tiffin bawm pawlin chawfun nitin ka pai thin a. Tumkhat chu ka classmate ten chaw hi bawm senduk (purple) Tupperware inti hian an pai deuh fur tih ka hmu a. Chuta tang chuan in ka haw a, ka chhungte hnenah ka ngen nghal. A tawpa tawpah chuan midang neih ang tiffin bawm hmelchhe zet mai Tupperware inti kher chu min lei ve ta a. Ka neih lai kha tha reng mahse midang neih ang kher neih ve duhna thinlung ka nei tlat. Mahni chauha nei lo ka ni bik ang tih ka hlau hle.

I thenawmten Tv chhuak thar ber an lei. Motor thar. Phone. Thawhnaw man to.

Engtin nge I awm? I thik em? I neih ve ngei ngei a ngai I ti ve thin em? Sum nei rih lo viau mah la I lei ve mai lohte chuan midang rual I pawl phak loh I hlau ve bawk si.

Hlimna tak thlentu a lo ni si lo. Hun reilote chhung chiah hlimna thlentu a ni. I lei lai leh a hnu reilote chhung I hlim a, hlim chhunzawm zel turin enge ngai? Lei belh zel a ngai.

A chhuak thar leh midang neih ang chu I lei ve ta zel a. Mahse, tawpni a awm em?

Tawpni A Awm Lo

Vawiin a chhuak thar phone kha kum a tlin hmain a lo hlui leh tawh.

Hun rei tak nghakhlel em ema I lei thawmhnaw thar kha tunah chuan an uar leh tawh lo. A common leh tawh lutuk.

Engkim mai hi a aia tha leh thar zawk chhuak a awm reng a. A chhuak thar apiang leh midang neih ang uma hringnun hman reng chu nun awmze nei lo tak a ni.

I nuna malsawmna chhiar rawh

Midang neih, kan neih ve loh hlir kan en a. Kan neih that malsawmna te theihnghilh hmin thakin. Eitur, thawmhnaw, in chenna, chhungte leh thiante. A ho emai kan tih, kan taksa bung hrang, kan hriselna, ni eng mawi takte, he khawvel pawisain a lei mai theih si loh te kan ngaihnep phah a.

Khawvel hmun hranah chuan tui thianghlim in tur tak ngial nei lo. Mahni nu leh pa ngeiin an duh loh a paih bo takte. Thih thleng raka hnathawk tura chhawr te. He khawvela engmah tak tak nei lo, vanduai vang maia an dinhmun duhawm lo taka piang an awm laiin midang neih va itsik mi chu a khawvel hmuh dan a tet zia a lang.

Midang neih leh neih lohah lo buai ve a ngai lo. An hausa emaw rethei pawh ni se, I nuna malsawmna tamtak I neih avangin lawmthu sawi zawk rawh. Mahni malsawmna chhiar thiam hi hausakna bultanna rilru chu a ni. I nunna I malsawna zawng zawng I ngaihtuah chuan I hausak zia I hria ang.

He khawvelah ro khawl khawm suh. Thi tur veka ruat hringmi tan chuan he khawvela ro khawl chu a at thlak hle. Thih hunah engmah kan chhawm theih dawn si lo.

He khawvelah hian enge I mamawh a, enge I duh? Duh leh mamawh hre hrang ang che. Nung turin kan mamawh chu a tam lo hle tih I hrechhuak ang. Thawmhnaw tamtak, phone thar, motor thar chu mamawh ni lovin duh mai chauh a ni. I hna atan I lo mamawh te a nih chuan I tan a ni a, he zawhna I inzawhin dik takin chhang ang che. A rah sengtu tur I ni si a.

Sum leh pai lamah duh duh lei thei dinhmunah I ding lo a nih phei chuan mamawh ni lova duh lei nana pawisa khawhral chu a at thlak hle. Ngaihtuah chian chuan awmzia a awm lo tak tak.

He nunkawng I zawh a, a chhuak thar leh lar apiang I um zui loh vanga midangin an hmusit che a, a rukin an rel che nia I hriat pawhin hlauthawng suh. Midang tih ang zela titu hlawhtling an awm ngai lo. Chu bakah in-man, phone man, tui bill, bill engmah an pek sak lo che. I dawhkawnah nitin chaw dahtu an ni lo. Midang ngaihdanin a chawm zo lo che.

Pawn langa hausak leh hlim hmel deuh, duh duh lei thei a lang, mahse leiba hlira khat bawk si. Thinlung chhunga rilru hah ngawih ngawih, inthat duh hial ai chuan 10/10 ah thlan a duhawm zawk.

Eng angin I nun harsa in sawisel tur tamin hre mah la lawmna tur tamtak I nei.

I lo theihnghilh pawh a ni thei. Nitina kan hman thin hmanrua a chhiat veleha a lo tangkai zia kan hriat chhuah thar leh thin ang hian. He thuziak hi I chhiar thei a nih ngat chuan I nunah malsawmna tamtak I nei.

Enge I tan hlimna tak tak chu? Midang tih ang zel zawm hi hlimna tak tak chu a ni em?

Zalenna chu I sual chhuah a ngai.

Share this Post

Post dang inang

Comments 1

Leave a Reply

Your email address will not be published. Required fields are marked *