Facebook Inbumna

Hrang ZahawmaNunnaLeave a Comment

Facebook
Facebook inbumna

Facebook vs. A Tak

Lo ngaithla la, social media (Facebook, Instagram, Twitter, Snapchat, etc) hmang lo kan awm mang lo. A bik takin Facebook. I hmang lo a nih chuan i ‘tunlai’ lo hle anga ngaih I ni. Miin thlalak an post sup sup a, thenkhatin status update hmangin khawnge an awm, tute nen nge, enge an tih, an testimony zawng zawng thlengin tarlan nan an hmang bawk. Hmanlai ngaihtuahin tun ang em em a thuthang inpawhna rang leh chak a awm lo. Mi thil thar neih kan hmu zung zung a, tunlaiah eng style nge lar, milar(celebrity) chanchin, khawchhung leh  rampawn news thlengin.

Midang thil neih kan hmuh zozai te avangin rual awhna a zual. Mihring mizia chu duhamna leh midang neih ang neih ve na a ni si a. Kan sum leh chhungte pawisa hmangin kan mamawh loh, midangin an uar avanga neih ve tlat ngai anga kan ngaih bungrua kan lei a. Sap tawnghmangah chuan “Keeping up with the Joneses” an ti. Midang a bikin thenawmte nena inelna chikhat- thawmhnaw man to, car chhuak thar, in neih len siak, fate sikul tha/to a indah siak, etc. I thenawmte neih ang I tluk zo lo a nih loh chuan anni aia hnuaihnung zawka inngaihna a ni bawk. Tawp chin a nei lo. A chhan chu nitinin thil thar, a aia tha zawk a rawn chhuak leh zel si a.

Facebookah I kal a, miin an thil lei thar an post sup sup a. I duh ve. Rualawh a na. I neih ve loh chuan mi ngaihnep I ni ang tih I hlau. Mihring mize dang pakhat leh chu thenrual ten min hnawl ang a, hnawhchhuah bik kan ni ang tih kan hlau.

Mahse, Facebook a thil dik lo deuh chu mi nun tak tak kan hmu lo. Miin an nun a anuam leh awh tur lai chiah an phochhuak. Thlalak nise vawi 100 chuang an la a, chuta tangin an lang thatna 2-3 vel chiah a hmuh theih. Thil tithei tak tak software leh app tamtak a awm tawh bawk a. Hmelthatna, hmai mamna, intih ngo na thlengin. Facebook thlalak aia hmeltha an awm lo an tih kha. Thlalak lak dawnin Facebook a post tur kan tia, hlim hmel leh nuam tih hmel takin kan nui der a. A hmun nuam lai ber berah in pose in. A hrelo, hmun hla tak ami chuan ‘A van nawm hmel em em, ka kal ve chak lutuk. A nun a van awhawm bik’ a lo ti ve thung.

Kan inelna nun hi a lem mai mai a ni. Hlawkna leh hmasawmna tak awm miah si lo. A lem leh dawt vek a ni tih hrelo thung chuan midang nun awtin mahni inngaihnepna atan an lo la kawi thei thung. Thutak ka hriat hmain miin thlalak nawm hmel tak tak an rawn post te hian, an profile tlawhin an nun a rukin ka awt viau thin. A ruka mahni insit deuh chungin. Tu amah nun hi Facebook a an post ang chauh a nuam leh a tluangtlam bik a awm lo. Hmeltha deuh, hausa si, hmun nawm hmel tak takah te kalin, thawmhnaw to takte ha pawh ni se. Mahni insitnaah hmang suh la, dawt vek a ni tih hria ang che. Nitinin an hlimin an nui reng kher lo. Nang aiin a let tam zawka beidawnna leh lungnaihnate pawh an nei ve tih hria ang che. Hringnun kalkawng ngil deuhva zawh tlang parh tumah an awm lo.

Hringnun aia harsa he khawvelah a awm lo. Kan kalkawng zawh a inang lo theuh va. Tunlai technology san vang leh rual awhna tam vangin mi nun duh suh la, I tum rawm chu panin hlawkna tak tak zawk zawng la. I hlawhtlin hma chu beidawng suh ang che.

Tho la ding ta che. I nun I siamthat loh chuan tumahin an siamsak dawn lo che.

Share this Post

Post dang inang

Leave a Reply

Your email address will not be published. Required fields are marked *