10 Software Pawimawh leh Tangkai (Free)

Hrang ZahawmaSoftware2 Comments

PC Software
PC Software
 Computer khawvel a lo changkang tawh bawk a. Software chi hran hman seng loh a awm. Thlan tur a tam laileng lutuk hi “Khawi hi nge tha a, khawi hi nge rintlak” tih zawhna a lo awm ta fo mai.
Chumi karah chuan software pawimawh leh tangkai thenkhat ka hman thin a ‘free’ ho ka rawn chhawp chhuak. A thlawn a nih vangin a chhia tihna a ni lo. Mamawh atana hman turin an hna an tlin hle. Software a man to tak tak  a ngai kher lo.
Software tarlan te (CCleaner tel lovin) download leh install awlsam dan ber: Ninite website atangin I duh thlang la, ‘Get Installer’ hmet la, install rawh. Hun rei tak senga a mal a install ngai lovin backgroundah amahin a lo install vek mai ang.
A zavaiin 10 ka pho lang a. Software dang thenkhat chu nidangah.

1. Antivirus – Microsoft Security Essentials

MSE Icon

I lo la hre lo a nih chuan Antivirus leh Anti-Malware chu neih ngei ngei tur.  Software I nei em tih I en hmasak ber te an ni(Antivirus a awm/update loh chuan Windows in a hriattir thin). Antivirus leh Anti-Malware neih loh chu, helmet tel lova bike chak tawka khalh ziah ang tluk a ni. Antivirus software thlan tur tha tak tak a tam mai. Microsoft Security Essentials hi tunah ka hmang mek. Hemi hlir ka la hmang, enga ti maw? Virus vangin harsatna ka la nei lo miau a. A free tho a dang fak hlawh em em chu Avira Antivirus. Ka hman lohna a rei tawh a, a chungchang sawitur lem ka nei lo.
Microsoft Security Essentials hi Windows 8 leh a chunglam I hmang a nih chuan download ngai lovin Windows ah a awmsa. Windows Defender tih hmingin. Mahni inven thiam chuan man to antivirus a tul lo.

2. Anti-Malware – Malwarebytes Anti-Malware

Antivirus nena kawp tur Anti-Malware. Malware chu a tlangpuiin software thalo-awm tha duhlo. I computer timuangtu, I password, email password ru theitu etc. tamtak a khawih chhe thei. Antivirus tam takin an chhar loh malware hi anti-malware in a chhar fo avangin a pahnihin kawp ngei ngei a tha.
 Malware leh virus chi hran tha lo tam tak thattu leh tlenfaitu atan Malwarebytes Anti-Malware tluka tha leh rinawm a awm lo. Amaherawhchu, a free version ah chuan mahni (manual) a hawn a, update hnua scan chawp a ngai. Real-time protection a tel lo bawk. He software hi neih ngei ngei tur.

3. Cleaner/Hnawk Tifaitu – CCleaner

Internet atanga temporary files leh hnawk mamawh loh lo inkhawlkhawm tifaitu. I computer atanga files hlui, tha tohlo leh a dang dang pawh a tifai vek. Registry, Windows startup leh a dang neuh neuh pawh pawh a tithei nual.
CCleaner – Download
Note: I install hunah toolbar vel leh software dang a extra ho kha engmah thun duh suh. Tangkai lo tihnawktu mai an ni.

4. Program Launcher/Software Rang Taka Hawnna – Launchy

 
I computer a program rang taka hawn mai na. He program chu a van ho, a tul lo hle mai I tih ka ring. Ka lo ngaihtuah ve thin dan chiah a ni…Ka hman thiam tak tak hmain. Tangkai lo hle in lang mahse, hman a awl em em a. Hun a lo reiin he program chu a lo van tangkai reuh I ti ngei ang.  Program hawng turin click kual teuh a ngai tawh lo. Install la, Alt+Space (default) hmangin program a lo inhawng anga, I program hawn duh hming I chhu anga, Enter -> zo der. Hman than chuan hemi tluka hman remchang leh awlsam a awm lo.

5. Image Viewer/Thlalak Enna – IrfanView

IrfanView
Windows a awmsa thlalak enna program ai chuan a chak zawkin, a famkim zawk. A zangkhai mai bakah a dang dang tihtheih a nei teuh mai. Thlalak resize te, a rawng thlak danglam te, etc. Thlalak edit na puitling software chu a ni lo na in, a neuh neuh vel chu a ti ve teuh thei mai.

6. Screenshot/Screen hmai thlalakna – Greenshot

 
I computer screen a lang mek khi a thla I la duh em? A nih chuan he program hi a awlsamin a tangkai takzet. I hmet zeuh anga I duh tak I computer screen hmai ami thla I la thei. I duh chuan a screen pumin, a nih loh pawhin screen a I duh lai bik chiah. A hman dan tlema inzir ve deuh chu a ngai a, mahse hun rei lo teah a tangkai zia I la hre mai ang.

7. Compression Tool/File Hawnna/Tih Mukna – 7-Zip

Zip leh rar archive file hrelo chu kan tlem ang. Chutiang ang file hawng tu leh siam tu a ni 7-Zip hi. He program hi a zangkhai a, a hmel a fai a, a chak bawk. A tih tur chiah chiah a behbawm tel lovin a ti. Neih ngei ngei chi. Windows a awmsa extractor ai chuan a let tamin a hman tlak fe.

8. File Search/File Zawnna – Everything

Everything
“Engkim Zawnna”. Computer chhunga file (hla, movie, software, etc) zawnna software. Everything tluka rang leh simple a awmlo. I hawng anga, I zawn duh hming I chhu anga, rang zetin a lo lang nghal char char ang.  A program hawnna tur shortcut key I pek phei chuan a rang lehzual.
A hming mai bakah a format (.mp3, .mp4, .avi, etc) nen pawhin a zawn theih bawk.

9. Software Unistaller/Software Paihna – Revo Uninstaller

Revo Uninstaller
Software paihna kimchang ber. Software thar han thun, han test chhin vel hi a nawm rualin. Hun reiah computer timuangtu leh tihnawktu a ni. Windows atanga uninstaller hi chuan hnuhma hi a hnutchhiah teuh thin a. Mahse, Revo Uninstaller chu a ni ve lo. Software chauh kha paih lovin, a hnuhma zawng zawng nen a tiboral vek. Hun a duh rei deuh na a, a manhla thung.

10. Note Lakna – Evernote

Evernote Open
Duh duh huna/hmuna note han ziah thlakna. I note ziah kha online atangin a hmuh nghal mai theih. A awlsam zia chu smartphone I hmang a nih phei chuan a inzawm tir vek theih. I duh chuan awlsam takin I note te midang nen I tawmpui (share) thei bawk. An website atang pawhin note thar a siam theih. A desktop software ka nei a, phone app ka nei bawka. Ka duh hunah note ka siam a, khawi atang pawhin internet a awm phawt chuan ka chhiar thei. A subject angrengin notebook ka siam thlap bawk.

Download

  • Ninite atanga software zavai(CCleaner tel lovin) automatic install na: Download
P.S. – Software tha leh tangkai I tih tarlan loh te zinga mi I nei a nih chuan comments lamah rawn thawh ve ta che.

Share this Post

Post dang inang

Comments 2

  1. GOSPEL

    NO.1 na khi a tha em em lo…..a secure mah mah mai bakah …virus emw malware vel a scan amuang ltuk..mhse microsoft in la update ve zel u nia..tun ah hi cuan ala chhe khwp mai..software zwng2 ablock vek alwm

Leave a Reply

Your email address will not be published. Required fields are marked *