Gnat Lalrinchhana

Hrang ZahawmaZaithiam1 Comment

Gnat Lalrinchhana old pic

Photos from Gnat’s public profile

R.I.P. Gnat Lalrinchhana

A zaithiam mai bakah Muay Thai lamah pawh Amateur International Championship ah silver medal a dawng pha. A mi naran lo hle. Eng thilah level sang thleng tur chuan thawhrim a ngaih angin Gnat a hi a lo special ve hle.

Born: February 28, 1982
Died: January 13, 2013

Gnat a thih chungchang interview A nu interview-na ngaihnawm tak Real Life Magazine

Gnat Lalrinchhana Hnamte Ngilhlohna

Thulakna: Nursery Vengchhung chanchinbu a chhuah Facebook lama post chhawn leh

Gnat Lalrinchhana Nghilh Lohna

January ni 14, 2013 zîng khaw vawt var kâra Mission Vêng chung atanga zawi muanga ni lo chhuak chuan danglamna a nei hran lo, a ên ngaiin a êng a, lumna a rawn ken tel chu Pu LT Zama in leh a chhehvêla khawr tât tâta dingkhâwm lât lâtte chuan duhthawh takin an ai a. Chumi pah chuan tukdanga helai vêla dingkhâwm ngai hlei lo mi engemawzah chuan an kalkhâwmna chhan thil thlen dân nia an hriat an sawiho laih laih a. Chhûn lama vuina hun hmanna tur singsaa Middle School tuala YMA hruaitu thenkhat che sang sangte chu an chêthmang atang chuan an phûr lo tih hairual a ni lo. Hawi vêl ila atuate mai pawh hmêl chu ruahthimpui lo thawk tur ang maia dur khuih ni vek mai hian a hriat!

Ni a tlângsân tawh hle hnu chuan Middle School tualah chuan khawi atang zozai nge mipui an lo punkhâwm tih hriat loh khawpa tam mipui an lût zut zut a. A then infiamna pêng hrang hranga thei mi tih hriata santha tak tak te; a then rampumin an zaithiam leh rimawi tum thiam avanga kan lo râlkhat hmêlhriat ve êm êm te, police uniform rawn ha khup khup lah an bo lo. A then lah mahni chênna mual muala mualkîl pha chin tih hriat ngawih ngawiha hmêl sâr larh te; thiam bîk nei hran chuang lo hemi nia he khawtlângin a sûn liam tur mahni awmhmun atanga lo ruahpui tawrh liam ngawt ngai ngam lo ni âwm tak te; Nursery Vêng nu leh pa an kim ang a, tih tur khawpa thu nghûk te leh he pasaltha mual liam mai tur tâna tihtheih hnuhnûng ber ti mêk ni âwma lang YMA member pawndum bât far ho te chu ruaipui theh zât chhiara chhiar lo awm ta se sângbi chhiar thlen hnuah kutchâng an la thliak ngauh ngauh ngei ang le.

Biakbûka mipui pungkhâwm zîngah tihphung leh dân anga neih vanga tel an awm nual thin lai leh puipunna tawh phawtah chuan a phawvuak tem mi tam tak an kuh fur thin laiin he hunah erawh hi chuan rilru hmun khat pû thapin mipui an pungkhâwm a, atua mah chu he huna kal tura tur luih leh ngen an awm chuang lo a, sâwm bîk lah an awm hek lo. Mahse, chuti chung chuan heti zât fakau hi engvanga lo pungkhâwm mai nge an nih? Pasaltha thlafam chang ta zûn hian mipui thinlung a fan a, chu chuan he hmun pan tur hian an kechheh a thunun a ni ngei ang.

Mipui khah nghûkna Middle School tual chuan a fa duat lai, a sên têt ata boruak tha leh hmun tha tak nêna a lo chawilen chuan Mizoram mai ni lo khawvêl huapa lâwmman nopui chawi thei hial khawpin a châwm seilian ang tih reng a ring pha bîk hauh lo ang. Hringfa iangin pau ve thei se he tualzâwl hian sûnna thu lungchhiatthlâk tak zawng a auchhuahpui ve ngeiin a rinawm.

Chutiang bawkin a kawmchhak lawka cement-a sak In chhâwng hnih, kum kha leh chen mi chungchuang lo chawiliantu pawh chuan a buchhip lai atanga hemi ni thlenga amah ngei pawh chawisângtu ni pahfâwm chanchin kipkawi chu mipui pungkhâwm hmaa puanzâr a châk zek zek ngei bawk ang.

Vânzâwlah thlasik nikang tak chu a sa vawl vawl hle. Chhûm leivâk leh hlim han siam tur eih chhûm thlalang hmuh tur chhe tê pawh a awm lo; mahse, chu Ni chuan a sûn ve nia mawiin a dul ruih thung si! Hemi nia piallei thuahriat hnuaia zalh ngei tur a nih miau avangin a lei taksa chu dai dek tawh mah se Josua iangin Ni pawh dina ni khat tal pawh chu a sakruang ropui zahawm tak chuan min châmpui se a duhawm ngawih ngawih. Mahse, zawimuangin Reiek tlângah khuan Ni chu a hreh hmel fahranin a tlum zûl zûl ta a.

A ni, vângkhua a ngui ngiai mai he mi hrâtkhawkhêng leh chungchuang fam chan ni hian. Nursery Vêng chuan nikum March 25, 2012-a Sikultlâng Model English Medium School tuala a khawnâwta World Muay Thai Championship, Bangkok, Thailand khawpuia neiha Silver Medal lâwmman rawn hâwna Thang rawnchhuahtu Gnat Lalrinchhana Hnamte lo haw a phâk ang tâwka a lo hmuah te kha engtikahmah a theihngilh leh tawh lo ang a, he ram leh he vêng hmingthatna tura beih leh zêl a intiamna awkâ te mawlh kha….Mizoram pum huap Volleyball tournament-a tum hnih ngawt tunhnaia a chi liahna vêng Nursery Vêng semi final-a hlângkaitu’n “Mizoram pum huap Volleyball tournament-ah Nursery Vêng hi kan la champion dâwn..” a tih tawngkam te kha…boruakah a thâmral ta mai dâwn em niang? Teuh lo mai, khâng thu zozaite kha a nih tur chanve pawha a sawitupa Gnat-a chawimawi thiam lo. Nursery Vêng mipui thinlungah engtikahmah a reh tawh lo ang a, beiseina a siamsak tawh tihhlawhtlin hi amah nghilh loh nâna Nursery Vêng hmachhawp lo ni mawlh teh sen.

Lady Diana thi England ramin ui taka “Goodbye, England Rose” a tih chuan Lady Diana thlen ve phâk loh leh tih ve theih hauh lo thleng phaa ti theitu Gnat-a hi Nursery Vêng hian “Adieu, Son of the Nurserians” a tih a phu êm! Greek pathian Zeus fapa duat kan ti zâwk dâwn em niang?

Uihawm tehkhawng hi ‘kan thil roh tak, kan la duhlai ngawih ngawih loh theih loha chânna’ hi a nih ngai chuan he Nurserians fapa hi uihawm tâwpthang zawng a ni ngei ang. Uihawm tih tawngkam hian a sawifiah pha hauh lo zâwk a niang chu a thih thu hre tawh phawt chuan naupang chumchiap atanga tleirâwl, nulâ tlangvâl atanga a tar azûrin “uihawm” tiin awlsam takin kan sawichhuak a. Mahse, kan hmêl leh kimtlâng chuan kan thinlung chhûngril pholangin – kan hnîm ruih vek mai! Chu chu uihawm hrilhfiahna hmuh theiha lo lang chu a ni.

Zoram leh zo hnahthlâk tawh phawt awmna hmun daidartu a hla sak lârzual “Mampui” tih hla chu ama tel tawh loa “I tel lo chuan” tia mittui sûr chunga ngaithlain “Ngaihzual” tiin kan ngaih tizualtuah a chang ang a. Kan mittui kochhuaktu hmanraw pakhat a ni dawn ta a ni. Mahse, thingkung atanga a dam hunchhûng hmang zo hlim hnahthel leithaa chang tura tla thla ang maia tu khawkha hriat loha tawihral mai tur ang ni loa hriatrengna tur min hnutchhiah hi a va vânneihthlâk tehlul êm!

Mahse, hmasâng mifingte ngaihsânzâwng tak pianphung heti maia rannung eiral mai tura lei hnuai thim râpthlâk taka zalh lo ngai ta erawh a pamhmai lua kan ti.
Gnat, i tlin lohna kan hre ve tho; mahse, Nurserians chuan tling kan ti che a, i mawi lohna leh famkim lohna te khuh bosak hman lêk loa thlafam min chansan ta hi i hmanhmawh lua kan ti a, he vêng tâna i hmachhawp zozaite kha a chanve chauh pawh min han thlengpui hman ni la heti ko hian kan baihvai lo tur. An hnung i zui Pu F Tlangsiama leh Pi Lalsangzuali Sailo te kan chân tumte khân nangma’n min la awmpui avangin kan thlaphâng lo kha a ni a; mahse, tunah nang leh zêl pawhin Nursery Vêng mipui min râwnna eih pawh nei loa hmanhmawh taka Tiaurâl min kaisan ta zêl hi kan ngai thiam hlawl lo a, theih ni se kan hauh rawn luai luai ngei ang che.

I sipai thian te, infiampui thin te, zaipui te leh i vêng mipui leh i hrai leh laina ten nangmah sûna chatuan pialrâla lawi tura kan thlahliam ni che khâ Jordan luirâl atang chuan lo lêtleh tura kan koh lawm lawm che thâwm i lo hriat a, i lo thlîr ngei kan ring a, theihchang se kîrtiang i rawn rêl ngei pawh kan ring tlat a ni. Mahse, nang zawng chhîngmit min khârsanin hnutiang min chhawn ta miau si a. Khuarei hian min la hnêm ve thei dâwn a nih ngai chuan engtikah emaw chuan kan la ziaawm ve mah na le!

Nursery Vêng fapa duatlai, lui râl i thlena chungchuang taka siamtu che i han hmachhawn hun chuan hei tal chauh i vêngte tân han ti ta che – i thachhangdâwltu tur he vêng chi al liak ngei an la awm ve theih nân bawkkhupin min han dilsak mawlh ang che…!

Music Videos

Bad Day Download (.m4a)

Lenmawi Download

A hla collection downloadna page hranpa ah a awm.

Music

Gnat Lalrinchhana Mp3 Download, Bad Day (.m4a) tih loh chu Mp3 format vek a ni.
Download link page tawpah.

Mizo Hla

  1. Aw Zoram
  2. Chhingkhual Lanu
  3. Duhaisam Tikimtu
  4. I Lawm Ang U (Krismas Hla) feat Zorema, Sanglura
  5. I Tello Chuan (Remix) feat Michael M. Sailo
  6. I Tello Chuan
  7.  Ka Ngai Em Che
  8. Ka Rose Pari
  9. Lenmawi
  10. Lung A Leng Em Mai
  11. Lung Ka Vai
  12. Lungdumtu
  13. Lunglen Tizualtu Zan Lalnu
  14. Mampui
  15. Ngaihzual

Sap Hla Cover

  1. Angels (Live at Peacefest 2006) =
  2. Bad Day (.m4a)
  3. Bells Will Be Ringing (Live 2007)
  4. Smooth
  5. The Sprit Carries On (Live)

Gnat Lalrinchhana Hla Download: Download Hla Collection

Share this Post

Post dang inang

Comments 1

Leave a Reply

Your email address will not be published. Required fields are marked *